امریکی صدر جو بائیڈن کی زبان ایک بار پھر لڑکھڑا گئی،ویڈیو وائرل

جوبائیڈن امریکا کو ایک لفظ میں بیان کرنے کی کوشش میں ناکام،منہ سے کچھ کا کچھ نکل گیا،صارفین کے دلچسپ تبصرے

جمعہ 24 جون 2022 12:45

واشنگٹن(اُردو پوائنٹ اخبارتازہ ترین - این این آئی۔ 24 جون2022ء) امریکی صدر جو بائیڈن کی زبان دوران خطاب لڑکھڑا گئی اور وہ خطاب میں امریکا کو ایک لفظ میں بیان کرنے کی کوشش میں ناکام ہوگئے۔میڈیارپورٹس کے مطابق سوشل میڈیا پر امریکی صدر جو بائیڈن کی ایک ویڈیو وائرل ہو رہی ہے جس میں وہ پوڈیم پر کھڑے تقریب سے خطاب کرتے نظر آرہے ہیں۔ ان کے ہمراہ امریکی نائب صدر کملا ہیرس بھی موجود ہیں۔

(جاری ہے)

ویڈیو میں دیکھا جا سکتا ہے کہ بائیڈن امریکا کو ایک لفظ میں بیان کرنے کی کوشش کرتے ہیں مگر ان کی زبان ساتھ نہیں دے پاتی اور ان کے منہ سے کچھ کا کچھ نکل جاتا ہے۔اس ویڈیو کو سوشل میڈیا صارفین خوب ٹرول کر رہے ہیں، اب تک اس ویڈیو کو 40 لاکھ بار دیکھا جاچکا ہے اور 8 ہزار بار ری ٹوئٹ کی جا چکی ہے۔واضح رہے کہ یہ پہلا موقع نہیں ہے جب امریکی صدر کی زبان پھسل گئی ہو، اس سے قبل وہ امریکی نائب صدر کملا ہیرس کو امریکی خاتون اول کہہ کر بھی مخاطب کرچکے ہیں۔ اس کے علاوہ پہلے اسٹیٹ آف یونین خطاب کے دوران انہوں نے یوکرین پر روسی جارحیت کے خلاف زور دیتے ہوئے یوکرینی کی بجائے ایرانی عوام کہہ دیا تھا۔