زائد کرایوں کی وصولی ،اوور لوڈنگ اور روٹ پرمٹ کی خلاف ورزی پر173گاڑیاں بند

اتوار 23 ستمبر 2018 20:31

راولپنڈی 23ستمبر(اُردو پوائنٹ اخبارتازہ ترین - اے پی پی۔ 23 ستمبر2018ء) ریجنل ٹرانسپورٹ اتھارٹی راولپنڈی نے زائد کرایوں کی وصولی ،اوور لوڈنگ اور روٹ پرمٹ کی خلاف ورزی پر173گاڑیاں بند کر دیں ۔سیکرٹری آر ٹی اے خالد یامین ستی نے اے پی پی کو بتایاکہ ٹرانسپورٹ اتھارٹی راولپنڈی نے اگست میں ضلع راولپنڈی میں چلنے والی پبلک ٹرانسپورٹ گاڑیوں کی جانب سے مختلف قوانین کی خلاف ورزیوں اوور لوڈنگ ،اوور چارجنگ اور روٹ کی خلاف ورزی پر مجموعی طور پر512چالان کر کے 3,34,500روپے جرمانہ وصول کیا ۔

خالد یامین ستی نے سرکاری خبررساں ادارے کو بتایاکہ زائد کرایوں کی وصولی و دیگر خلاف ورزیوں کو روکنے کے لیے آرٹی اے کی ٹیمیں چھاپے مار کر کارروائیاں کرتی ہیں اور قواعد و ضوابط کی خلاف ورزی پر جرمانے کیے جاتے ہیں ۔

(جاری ہے)

اسی طرح ریجنل ٹرانسپورٹ اتھارٹی نے زائد کرایوں کی وصولی اور اوور لوڈنگ کی روک تھام کے لیے خصوصی اسکواڈ تشکیل دیئے ہیں جو مختلف کارروائیاں کرتے ہیں ۔

انہوں نے بتایاکہ مئی میں زائد کرایوں اور دیگر خلاف ورزیوں پر کی جانے والی کارروائیوں کے دوران خلاف ورزی کے مرتکب ڈرائیورز کو وارننگ بھی جاری کی گئی اور انہیں خبردار کیا گیا کہ وہ آئندہ ان خلاف ورزیوں کے مرتکب نہ ہوں ۔انہوں نے قومی خبر ایجنسی کو بتایاکہ ریجنل ٹرانسپورٹ اتھارٹی کی ٹیموٓں نے یکم اگست سے 30اگست تک سینکڑوں گاڑایاں چیک کی گئیں جن میں بغیر فٹنس کے 322گاڑیاں پائی گئیں جبکہ ناقص سی این جی سلنڈرز کی حامل 09گاڑیاں سامنے آئیں ۔

انہوں نے بتایاکہ اس صورتحال پر ٹیموں نے 173گاڑیاں بند کردیں ۔خالد یامین ستی نے قومی خبر رساں ایجنسی سے بات چیت کرتے ہوئے کہاکہ پبلک ٹرانسپورٹ گاڑیوں کے خلاف مہم باقاعدگی سے جاری ہے اور اوور لوڈنگ ،اوور چارجنگ سمیت روٹ پرمٹ کی خلاف ورزی کرنے والوں کے خلاف سخت کارروائی کی جائے گی ۔ایک سوال کے جواب میں خالد یامین ستی نے کہاکہ پبلک ٹرانسپورٹ کے کرایوں میں کسی قسم کا ردو بدل نہیں کیا گیا تاھم اگر اس کے باوجود کسی بھی روٹ پر زائد کرایہ وصول کیا جا رہاہو تو ریجنل ٹرانسپورٹ اتھارٹی ایسے ٹرانسپورٹرزکے خلاف سخت ترین کارروائی کرے گی ۔مسافروں کو چاہیے کہ زائد کرایوں کی وصولی بارے ریجنل ٹرانسپورٹ اتھارٹی کو اطلاع دیں ۔