آئی سی سی نے زمبابوین فاسٹ بائولر برائن ویٹوری کا بائولنگ ایکشن قانونی قرار دے دیا

دبئی ۔ (اُردو پوائنٹ اخبارتازہ ترین - اے پی پی۔ 20 جنوری2018ء) انٹرنیشنل کرکٹ کونسل (آئی سی سی) نے زمبابوین فاسٹ بائولر برائن ویٹوری کے بائولنگ ایکشن کو قانونی قرار دیتے ہوئے انہیں دوبارہ انٹرنیشنل کرکٹ میں بائولنگ کی اجازت دے دی، جنوری 2016ء میں بنگلہ دیش کے خلاف ٹی ٹونٹی میچ میں ویٹوری کا ایکشن رپورٹ کیا گیا تھا، ایکشن رپورٹ ہونے کے بعد انہوں نے چنائی، بھارت میں ٹیسٹ دیا جس میں ان کی تمام ڈلیوریز غیرقانونی پائی گئیں جس پر آئی سی سی نے ان کے ایکشن کو غیرقانونی قرار دیتے ہوئے ان پر ڈومیسٹک اور انٹرنیشنل کرکٹ میں بائولنگ کرانے پر پابندی عائد کر دی۔

(جاری ہے)

آئی سی سی کی طرف سے جاری کردہ بیان کے مطابق حالیہ بائیو مکینک ٹیسٹ میں ویٹوری کی تمام ڈلیوریز درست پائی گئی ہیں جس کے بعد اب وہ دوبارہ انٹرنیشنل کرکٹ میں بائولنگ کرانے کے اہل ہو گئے ہیں۔ انہوں نے 2011ء میں انٹرنیشنل کیریئر کا آغاز کیا تھا اور انہیں اب تک چار ٹیسٹ، 20 ون ڈے اور 11 ٹی ٹونٹی میچز میں ملک کی نمائندگی کا اعزاز حاصل ہے۔