مانچسٹر سٹی کا لیونل میسی کو خریدنے پر غور

مانچسٹر (اردو پوائنٹ تازہ ترین اخبار۔26اگست 2020ء ) برطانوی فٹ بال کلب مانچسٹر سٹی، ہسپانوی فٹ بال کلب بارسلونا اور ارجنٹینا کے 33 سالہ سٹار فٹبالر لیونل میسی کو خریدنے پر غور کررہی ہے تاہم برطانوی میڈیا کا کہنا ہے کہ ایسا اسی صورت میں ہوسکتا ہے کہ اگر بارسلونا کے فارورڈ اپنی دستیابی ظاہر کریں گے۔ اطالوی فٹبال کلب انٹر میلان کے سابق مالک ماسیمو موراتی کا کہنا ہے کہ ان کا سابق کلب لیونل میسی کو خریدنے کی کوشش کررہا ہے۔

دوسری جانب فرانسیسی فٹ بال کلب پیرس سینٹ گرمین کے سربراہ تھومس ٹچیل کا کہنا ہے کہ ان کا کلب میسی کو خوش آمدید کہے گا تاہم انہیں یقین ہے کہ لیونل میسی بارسلونا میں رہنے کو ترجیح دیں گے۔ برطانوی سپورٹس چینل کو انٹرویو دیتے ہوئے ان کا کہنا تھا کہ میرے خیال میں میسی بارسلونا میں رہتے ہوئے ہی اپنے کیرئیر کو خیرباد کہیں گے، میسی مسٹر بارسلونا ہیں۔

(جاری ہے)

سٹار ہسپانوی کھلاڑی کا سیزن انتہائی مایوس کن طور پر اختتام پذیر ہوا جہاں ان کی ٹیم کو چیمپئنز لیگ کے کوارٹر فائنل میں جرمن فٹبال کلب بائرن میونخ کے ہاتھوں دو کے مقابلے میں 8 گولز سے شکست ہوئی۔