سری لنکا سے یواے ای منتقل ہونے کے بعد ایشیا کپ کی تاریخوں میں ردو بدل پر غور

دبئی (اردو پوائنٹ تازہ ترین اخبار ۔ 22 جولائی 2022ء ) ایشیا کپ کا مقام سری لنکا سے دبئی منتقل ہونے کے بعد اب ایونٹ کی تاریخوں میں ردوبدل پر بھی غور کیا جا رہا ہے ۔

(جاری ہے)

نجی ٹی وی "جیو نیوز "کے مطابق ایشیا کپ کی میزبانی سری لنکا کے پاس ہے جبکہ ملک میں کشیدہ سیاسی صورتحال کے باعث ایونٹ یو اے ای میں ہوگا، سری لنکا کرکٹ بورڈ نے ایشیا کپ ملک میں نہ کرانےکا فیصلہ کیا ہے، ذرائع کا کہنا ہےکہ سری لنکا کرکٹ، ایشین کرکٹ کونسل اور ایمریٹس کرکٹ بورڈ کے درمیان بات چیت جاری ہے، تینوں فریقین باہمی مشاورت سے شیڈول کو حتمی شکل دینےمیں مصروف ہیں جب کہ ایمریٹس کرکٹ بورڈ نے ایونٹ جلد شروع کرنےکی تجویز دی ہے۔

رپورٹ کے مطابق ایشیاکپ 24 اگست سے10 ستمبر تک کرانے کی تجویز بھی سامنےآئی ہے جب کہ اعلان کردہ تاریخوں کے مطابق ایشیا کپ 27 اگست سے11 ستمبر تک کھیلا جانا ہے، ذرائع نے بتایا کہ تینوں فریقین اگلے دو سے تین روز میں تمام معاملات کو حتمی شکل دینے کے لیے پرامید ہیں۔