اولمپک کونسل آف ایشیا ایشین گیمز 2026ء میں کرکٹ کو شامل کرنے کا خواہاں

ٹوکیو (اردو پوائنٹ تازہ ترین اخبار ۔ 29 فروری 2024ء ) اولمپک کونسل آف ایشیا (او سی اے) جاپان میں منعقد ہونے والے 2026ء کے ایشین گیمز میں کرکٹ کو شامل کرنے کی کوشش کر رہی ہے تاکہ اس کھیل کو دیکھنے والوں کی تعداد میں اضافہ ہو سکے۔ اس مقصد کے لیے او سی اے ایشین گیمز میں کرکٹ میچز کے لیے ایک اسٹیڈیم بنانے کے لیے کام کر رہا ہے، اطلاعات کے مطابق ناگویا میں ایک بیس بال اسٹیڈیم کو تبدیل کیا جائے گا تاکہ اس کھیل کو میگا ایونٹ میں شامل کیا جاسکے۔

ناگویا، جاپان میں ایچی پریفیکچر کا دارالحکومت ہے اور 2026ء کے ایشین گیمز اس شہر میں منعقد ہوں گے اور اسی وجہ سے اولمپک کونسل شہر کے مضافات کے قریب ایک مقام چاہتی ہے۔ تاہم جاپان کرکٹ ایسوسی ایشن چاہتی تھی کہ اب سے دو سال بعد ہونے والے ایشین گیمز کے دوران کرکٹ میچز توچیگی پریفیکچر میں کرائے جائیں۔

(جاری ہے)

او سی اے کے قائم مقام صدر رندھیر سنگھ 2026 کے ایشین گیمز میں اس کھیل کو شامل کرنے کے خواہشمند نظر آئے اور کہا کہ "ہم اب بھی 2026ء کے کھیلوں کے پروگرام پر کام کر رہے ہیں لیکن ہاں، ہم چاہیں گے کہ کرکٹ اس کا حصہ ہو۔

" او سی اے کے ڈپٹی ڈائریکٹر جنرل ونود کمار تیواری نے کہا کہ توچیگی پریفیکچر اس مقام سے ساڑھے تین گھنٹے کی دوری پر ہے جہاں اولمپک گیمز منعقد ہوں گے اور یہی وجہ ہے کہ وہ ناگویا کو اپنے بنیادی کرکٹ مقام کے طور پر حتمی شکل دینے کے خواہاں ہیں۔ او سی اے کا ایک جنرل اجلاس منعقد ہوگا جہاں اپریل میں ایشین گیمز 2026ء کے شیڈول کو حتمی شکل دی جائے گی۔ کرکٹ کو 2028ء کے اولمپک گیمز میں شامل کیا جائے گا اور 128 سال بعد دنیا کے سب سے بڑے کھیلوں کے ایونٹ میں واپسی ہوگی۔ ہانگزو میں 2022ء کے ایشین گیمز میں بھی اس کھیل کو شامل کیا گیا تھا۔