آئیگا سویٹیک اورآریانا سبالینکا اٹالین اوپن ٹینس ٹورنامنٹ کے فائنل میں پہنچ گئیں

روم (اُردو پوائنٹ اخبارتازہ ترین - اے پی پی۔ 17 مئی2024ء) پولینڈ کی نامور ٹینس سٹار ،عالمی نمبر ون اور ایونٹ کی ٹاپ سیڈڈ آئیگا نتالیہ سویٹیک اپنی فتوحات کے سلسلے کو برقرار رکھتےہوئے اٹالین اوپن ٹینس ٹورنامنٹ میں خواتین کے سنگلز مقابلوں کے فائنل رائونڈ میں پہنچ گئیں ۔ دو بار کی اٹالین اوپن چیمپئن ،22 سالہ پولینڈ کی ٹینس سٹار نے سیمی فائنل راؤنڈ میں امریکی حریف کھلاڑی کوکو گف کے خلاف سٹریٹ سیٹس میں کامیابی حاصل کی ۔

آئیگا سویٹیک نے 2021 اور 2022 میں اٹالین اوپن کا ویمنز سنگلز ٹائٹل اپنے نام کیا تھا۔بیلاروس کی نامور ٹینس سٹار اور ایونٹ کی سیکنڈ سیڈڈ آریانا سبالینکا نے بھی سیمی فائنل لائن عبور کر کے ٹاپ فائنل میں اپنی جگہ پکی کر لی ہے ۔ ڈبلیو ٹی اے کے زیر اہتمام اٹالین اوپن ٹینس ٹورنامنٹ کے دلچسپ مقابلے اٹلی کے دارالحکومت روم میں جاری ہیں ۔

(جاری ہے)

ویمنز سنگلز مقابلوں کے پہلے سیمی فائنل میچ میں عالمی نمبر ایک پولینڈ کی آئیگا نتالیہ سویٹیک نے انتہائی شاندار کارکردگی کا مظاہرہ کرتے ہوئے امریکی حریف کھلاڑی کوکوگف کو سٹریٹ سیٹس میں 4-6 اور 3-6 سے ہرا کر فائنل کے لئے کوالیفائی کیا ۔ آئیگا سویٹیک نے ایک گھنٹہ اور 47 منٹ میں امریکی حریف کھلاڑی کو شکست دی ۔دوسرے سیمی فائنل میچ میں بیلاروس کی نامور ٹینس سٹار اور ایونٹ کی سیکنڈ سیڈڈ آریانا سبالینکا نے عمدہ کھیل پیش کرتے ہوئے امریکا کی ہی ٹینس کھلاڑی ڈینیئل کولنزکو سٹریٹ سیٹس میں 5-7 اور 2-6 سے ہر اکر فائنل کے لئے کوالیفائی کیا۔ فائنل میں آئیگا نتالیہ سویٹیک کا مقابلہ آریانا سبالینکا سے ہوگا۔\932