ٹینس کے کھلاڑی عالمی سطح پر ملک کا نام روشن کر رہے ہیں٬ٹینس کے فروغ کیلئے بھرپور تعاون کرینگے‘ذوالفقار احمد گھمن

لاہور (اُردو پوائنٹ اخبارتازہ ترین - این این آئی۔ 17 اکتوبر2016ء) ڈائریکٹر جنرل سپورٹس پنجاب ذوالفقار احمد گھمن نے کہا ہے کہ ہمارے ٹینس کے کھلاڑی عالمی سطح پر ملک کا نام روشن کر رہے ہیں٬ ٹینس کے فروغ کیلئے رشید ملک نے گراں قدر خدمات سرانجام دی ہیں ٬یہ ہمارے ملک کا سرمایہ ہیں٬ ٹینس کے فروغ کیلئے مکمل تعاون کریںگے ۔ان خیالات کا اظہار انہوں نے پیر کے روز سپورٹس بورڈ پنجاب میں پنجاب لان ٹینس ایسوسی ایشن کے سیکرٹری جنرل رشید ملک کی قیادت میں ملاقات کرنیوالے وفد سے گفتگو کرتے ہوئے کیا۔

ڈی جی سپورٹس پنجاب ذوالفقار احمد گھمن نے کہا کہ رشید ملک جیسے کھلاڑی ملک کا اثاثہ ہیں٬ان کی کاوشوں سے ٹینس کا کھیل ترقی کررہا ہے٬ نیشنل جونیئر ٹینس چمپئن شپ کے انعقاد سے نوجوان کھلاڑیوں کی حوصلہ افزائی ہوگی اور نیا ٹیلنٹ ابھر کر سامنے آئے گا٬ سپورٹس بورڈ پنجاب چمپئن شپ کے انعقاد اور ٹینس کے فروغ کیلئے ہر طرح کا تعاون فراہم کرے گا۔

(جاری ہے)

پنجاب لان ٹینس ایسوسی ایشن کے سیکرٹری جنرل رشید ملک نے کھیلوں کے فروغ کیلئے سپورٹس بورڈ پنجاب کے کردار کی تعریف کی اور کہا کہ سپورٹس بورڈ پنجاب نے نوجوان کھلاڑیوں کی ہمیشہ حوصلہ افزائی کی ہے اس وجہ سے آج ہر کھیل ترقی کررہا ہے٬رشید ملک نے 22سے 26اکتوبر تک باغ جناح میں منعقد ہونیوالی زیڈ ٹی بی ایل نیشنل جونیئر ٹینس چمپئن شپ کی اختتامی تقریب میں ڈی جی سپورٹس پنجاب ذوالفقار احمد گھمن کو مہمان خصوصی بننے کی دعوت دی جو انہوں نے قبول کرلی٬ رشید ملک نے ٹینس کے فروغ کیلئے سپورٹس بورڈ پنجاب کے تعاون پر شکریہ ادا کیا۔