سریلی دیگ، شاعرانہ رائتہ

حیرت کا جھٹکا لگا؟ جی ہاں یقین مانئیے، سریلی دیگ اور شاعرانہ رائتہ، ہم نے اپنی آنکھوں سے دیکھا۔  آئیں یہ بپتا آپ کو بھی سنائے دیتے ہیں۔ ہمارے ایک دوست کا نام شفیق ہے۔ اور اپنی ذات میں بھی وہ ایک شفیق ہستی ہیں۔ پر ان کے کچھ راز کھانے کی محفل میں پھر راز نہ رہے۔
لوگ پیتے ہیں تو بہکتے ہیں۔ ساغر صدیقی پیتا تھا تو غزل لکھتا تھا۔

پر شفیق بھائی جو اردو میں ایم فل کر رہے ہیں۔ رائتہ پیتے ہیں تو غزل کہتے ہیں۔ ایک چمچ رائتہ پیتے ہیں تو مطلع کہتے ہیں۔ رائتہ کی پیالی پیتے ہیں تو غزل کا بند کہتے ہیں۔ پورا بول رائتہ کا پیتے ہیں تو غزل کہتے ہیں۔ ایک محفل میں ہم نے پورے دس باؤل مطلب پوری دس غزلیں سنیں۔ اور اپنی گنہگار آنکھوں سے باقی احباب  کی طلب رائتہ کے لئے دیکھی۔

(جاری ہے)

پر رائتہ غزلوں کی نظر ہو چکا تھا۔
شفیق بھائی کی آواز میں تو ساز کیا دور دور تک زہریلا سا سر بھی نہیں۔ پر اگر کہیں دیگ چڑھی ہو اور اس دیگ کے (برتاؤ) کی ذمہ داری شفیق بھائی کے ذمہ لگی ہو تو ان کے انگ انگ میں مسرت کی دھنیں پھوٹنے لگتی ہیں۔ اپنے دوستوں کو ایسی ایسی مصالحہ جات باتیی لگاتے ہیں کہ مرچ بھی نہیں لگنے دیتے اور ہنسنے بھی نہیں دیتے۔

کچھ موقعوں پر بلکہ دیکھا، رونے بھی نہیں دیتے۔ آپ سمجھ رہے ہوں گے، یہ ان کی ذات کا خاصہ ہے۔ پر ہم چشم دید گواہ ہیں یہ سریلی دیگ کے اثرات ہیں۔
کیونکہ دیگ آنچ پر نہیں ہوتی، ان کا انگ انگ حس مزاح کی لطافت کے انگاروں پر دہک رہا ہوتا ہے۔ متاثر کن بات جو دیکھی، اگر دیگ مٹن کی ہے تو ان کی گفتگو شہد سے زیادہ میٹھاس سے بھری دیکھی۔ اگر دیگ میں بڑا گوشت دیکھا تو انہیں بھی شیخ چلی جیسی باتیں بگھارتے دیکھا۔

اگر دیگ میں چکن دیکھا تو ان کا لہجہ بھی تلخ دیکھا۔ اگر دیگ  میں چاول دیکھے تو ان کی باتوں میں بھی پھوکا پن دیکھا۔ پر تمام دیگوں میں ایک یکسانیت دیکھی، اور وہ ہے ان کا رائتے کے لیے پیار۔
یہ پیار دیکھ کر تو مجھے انڈین مووی "جسم"  اور اسی فلم کے کے سیکوئل میں جان ابراہم اور بپاشا باسو، سنی لیون اور رندیپ ہودا کا پیار بھی اتنا پاکیزہ نہیں لگا۔

جتنا شفیق بھائی کا پیار رائتہ کے لیے۔ کتنی بے باکی سے، دنیا کی پرواہ کیے بغیر اپنی جسمانی بھوک وہ رائتہ سے مٹاتے ہیں۔ اور ڈنکے کی چوٹ پر ہر دیگی موقع پر اپنی محبت کا اظہار برملا کرنا نہیں بھولتے۔ ان کے سچے عشق کو مدنظر رکھتے ہوئے یار لوگوں کو مشورہ ہے، گوشت کی دیگ کے ساتھ اگر ایک رائتہ کی دیگ  بھی کر لی جائے تو مہمان بھی خوش اور سچی محبت کے ملاپ کے تسکین بھرے لمحات ہمیں بالی ووڈ کی فلموں میں تلاش کرنے کی ضرورت بھی نہ پڑے گی۔