عربی زبان کا عالمی دن

دنیا میں سب سے زیادہ بولی جانے والی زبانوں میں چینی، انگریزی وغيرہ کے بعد عربی زبان کا چوتھا نمبر ہے،دنیابھر کے26 ممالک اسے سرکاری زبان کے طور پر تسلیم کرتےہیں،عرب دنیا کے تقریبا 40 کروڑسے زائد افراد اس کو مادری زبان کے طور پر بولتے ہیں جب کہ دنیا بھر میں 1.7 ارب سے زیادہ مسلمان ثانوی حیثیت سے اس زبان کا استعمال کرتے ہیں، قرآن کریم کی زبان ہونے کے سبب عربی کو خصوصی تقدس حاصل ہے اور دین ِ اسلام میں نماز، حج ،تلاوت ،اذکار اور دیگر عبادتیں اس کے بغیر پوری نہیں ہوتی ہیں۔

(جاری ہے)

عربی زبان کا تعلق سامی زبانوں سے ہے اور اس کے حروفِ تہجیّ کی تعداد 28 ہے۔ عربی زبان کو لُغتُ الضّاد "ض” (ضاد کی زبان) بھی کہا جاتا ہے؛جس کی وجہ یہ ہے کہ بعض ماہرینِ لسانیات کا خیال ہے کہ دنیا کی کسی بھی اور زبان میں اس تلفظ کا حرف نہیں پایا جاتا ۔
عربی زبان اپنی وسعت ،جامعیت اور آفاقیت کی وجہ سے دنیا کی چھ بڑی زبانوں میں شمار کی جاتی ہے۔

اس کی قدامت و پختگی،طرز و انداز کی شیرینی، استعارات کی رنگینی ،گرامر (صرف ونحو) کی ہمہ گیری اور ان سب سے بڑھ کر خدا کے آخری کلام کی ترجمانی و نمائندگی اسے دنیا کی تمام زبانوں سے ممتاز کردیتی ہے۔حضور اکرم ﷺنے ارشاد فرمایا:’’عربی زبان تین وجہ سے مرکزمحبت بننے کی مستحق ہے ،سب سے پہلے تویہ کہ میں عربی ہوں ، دوسرے خدا کے کلام پاک کی زبان عربی ہے ،تیسرے یہ کہ تمام جنتیوں کی زبان عربی ہوگی ‘‘۔

(معجم کبیر طبرانی)
حضرت عمر بن زید کہتے ہیں کہ’’ حضرت عمر رضی اللہ عنہ نے حضر ت ابو موسیٰ اشعری ؓ کو لکھا کہ تم سنت اورعربیت میں تفقہ حاصل کرو ۔‘‘
ہمیں تاریخ یہ بتاتی ہے کہ قُرون ماضی میں اسلام کے پھیلنے اور مسلمان حکمرانوں کی فتوحات نے عربی زبان کو بلند مقام تک پہنچانے میں اہم کردار ادا کیا۔ عربی زبان دنیا کی کئی زبانوں پر براہ راست یا بالواسطہ طور پر اثر انداز ہوئی۔

ان زبانوں میں ترک، فارسی، کرد، اردو، ملیشیائی، انڈونیشی اور البانوی کے علاوہ افریقا میں ہاؤسا اور سواحلی جب کہ یورپ میں انگریزی، پرتگالی اور ہسپانوی شامل ہیں۔حالیہ دور کے فرانسیسی مستشرقین اور محققین کا کہنا ہے کہ یورپی زبانوں کی ڈکشنریوں میں سائنس، طب، فلکیات اور دیگر علوم وفنون سے متعلق عربی کے 2500 سے زیادہ الفاظ موجود ہیں۔

اس وقت یورپ میں عربی زبان بولنے والوں کی تعداد 2 کروڑ سے زیادہ ہے۔ موجودہ ڈیجیٹل دور میں بالخصوص سوشل ویب سائٹس پر عربی زبان کا استعمال تیزی سے فروغ پا رہا ہے۔تازہ ترین اعداد و شمار کے مطابق گزشتہ 10 برسوں کے دوران انٹرنیٹ پر استعمال ہونے والی زبانوں میں عربی زبان نے سب سے زیادہ تیزی سے ترقی کی ہے۔
عربی کو کئى علاقائی اور بین الاقوامی تنظیموں کی سرکاری زبان ہونے کا اعزاز بھی حاصل ہے۔

ان میں عرب لیگ، اسلامی تعاون تنظیم (او آئی سی)، افریقی یونین اور اقوام متحدہ شامل ہیں۔
18 دسمبر 1973 کو اقوام متحدہ کی جنرل اسمبلی نے عربی زبان کو اپنی سرکاری زبانوں میں شامل کرنے کا فیصلہ کیا۔ 19 فروری 2010 کو اقوام متحدہ کے ذیلی ادارے یونیسکو نے انسانی تہذیب اور ثقافتی ورثے کو محفوظ رکھنے میں عربی زبان کے اہم کردار کو تسلیم کرتے ہوئے 18 دسمبر کو اس زبان کا عالمی دن قرار دیا۔

اس پر عمل درامد کرتے ہوئے 18 دسمبر 2012 کو پہلی مرتبہ عربی زبان کا عالمی دن منایا گیا۔
موجودہ دور میں عربی زبان سیکھنے اور سکھانے کے فریضہ کو ادارہ حفاظ ایجوکیشن سسٹم بخوبی سر انجام دے رہا ہے. یہ ادارے جہاں کہیں بھی ہیں اللہ تعالیٰ ان کو کامیابی و کامرانی عطا فرمائے. ویسے یہ ایک دنیا کا اصول بنتا جا رہا ہے کہ اکثر و بیشتر ہم دنیا کی آسانی کو اہمیت دیتے ہیں اور اگر اس کے حصول کے لئے کسی زبان کا سیکھنا ضروری ہو جائے تو ہم جی توڑ کوشش کر کے اس زبان کو سیکھتے ہیں؛تاکہ ہم اس زبان دانی کے ذریعے اپنے معاش کا انتظام کرسکیں اور اپنی دنیا کو آسان سے آسان تر بناسکیں؛لیکن کیا ہم نے اس بات پر کبھی سنجیدگی سے غور کیا کہ عربی زبان کے ذریعے ہم انبیاءِ کرام علیہم السلام کے پہنچائے ہوئے وہ حقائق و اصول سیکھ سکتے ہیں؛ جس سے ہماری زندگی بھی صحیح راہ پر گامزن رہے اور آخرت میں بھی کامیابی ہمارے قدم چومے۔

کیا ہمیں زندگی گزارنے کےلیے صحیح طریقے کی ضرورت نہیں؟ کیا آخرت کی فکر مندی ہمارے لئے اہم نہیں ؟ اور کیا موجودہ طرز عمل غفلت و کسل مندی کی دلیل نہیں؟غورکیا جائے تو عربی زبان سے دور ہوکر ہم نہ صرف اپنی آخرت؛بلکہ دنیا میں بھی ناکامی کا انتظام کر رہے ہیں؛اس لیےاس ہنگامی ضرورت اور اس کی اہمیت کا ادراک کیجئے! اپنے رب کی طرف لوٹ آئیے!اس کے پیغام کو سمجھنے کے لئے اس کے کلام کی زبان سیکھنے کی کوشش کیجئے!اس کو اہمیت دیجئے اور اس کے لئے مختصر ہی سہی کچھ وقت ضرور نکالیئے!