چاند

حسب روایت اس بار بھی پشاور میں مسجد قاسم علی خان والوں کورمضان کا چاند ایک دن پہلے اور باقی پاکستان کو حسب توقع ایک دن بعد نظر آیا، یہ بہت اچھی بات ہے کہ روایت برقراررہی،روایات برقرار رہنی چاہیے اور توقعات بھی نہیں ٹوٹنی چاہیے،ان روایات میں زندگی کاحسن ہے اور ان ہی توقعات سے زندگی کی ڈور وابستہ ہے ،یہ ڈور کٹ گئی تو باقی کیا بچے گا؟
برس ہا برس سے یہ خواہش کی جاتی ہے کہ خدا کرے پورے سال کی طرح رمضان او ر عید کاچاند بھی ایک ساتھ نظر آیا کرے ،تا کہ ہم روزے بھی ساتھ رکھیں اور عیدبھی ساتھ ہی منائیں۔

یہ خواہش رکھنا بھی اچھی بات ہے ، ایک دوسرے سے محبت کی دلیل ہے لیکن ضروری تو نہیں ساری خواہشات پوری ہو جایا کریں،اگر خواہشات کا پورا ہونا اتنا آسان ہوتا تو بے چارے شاعرکو تڑپ کر یہ کیوں کہناپڑتا :
لیکن اس کا یہ مطلب بھی نہیں خواہشات کا گلا گھونٹ دیا جائے، خواہشات رکھی ہی نہ جائیں ، ان کو زبان پر نہ لایا جائے، نہیں نہیں، خواہشات ہونی چاہیے، خواہشات نہیں ہوں گی تو دم گھٹ جائے گا، کیوں کہ خواہش ہی کی آس پر نبضیں چلتی ہیں ۔

(جاری ہے)

یہی وجہ ہے خواہش کا مزہ تبھی تک رہتا ہے جب تک پوری نہ ہو۔ جس دن جو خواہش پوری ہو گئی ، اس کا مزہ ختم ہو جاتا ہے،ایک ساتھ آغاز رمضان اور ایک ساتھ عیدمنانے کی خواہش کچھ چھوٹی موٹی تو نہیں یہ قومی خواہش ہے ،یہ پوری ہو گئی تو کیا مزہ رہے گا۔اس کے بقاہی میں جو لطف ہے وہ اس کو پا کر نہیں ملے گا۔
ویسے چاند چیز ہی ایسی ہے، چاند نگر کا چاند ہو یا عام نگر کاچاند،اس سے محبت سب کو، اس سے لگاؤ سب کو، لیکن یہ ہر کسی کے بس کا نہیں، ہر ایک اس کو دیکھنا چاہتا اور اس سے پیار کرنا چاہتا ہے لیکن یہ اعزاز بھی کسی کسی کو ملتا ہے ، چاند اسی کو دکھتا ہے جس کو دکھنا چاہے ،پیار بھی وہی کر سکتا ہے جس کا پیارخود چاند کو قبول ہو۔

کسی کوچندا اور چاند کہنے پر تو شاید پابندی نہ ہو لیکن چندااور چاند بنانے پر پابندیاں ہی پابندیاں ہیں، یہ پابندیاں چاند خود ہی لگاتا اور خود ہی ہٹاتا ہے۔
خدا سب کے چاندوں کو سلامت رکھے ، چاند کے اور چاند پہ جھگڑوں سے بچائے،آمین!