بدترین اخلاقی گراوٹ کا شکار معاشرہ

سچ کہتے ہیں کہ جہاں علم کی روشنی نہ ہو وہاں جہالت کے اندھیروں کو کوئی نہیں روک سکتا ہمارے ملک میں اگرچہ آئے روز نت نئے جہالت کے نمونے دیکھنے کو ملتے رہتے ہیں کہ ہماری کسی بھی حکومت نے تعلیم کو کبھی بھی اولین ترجیح نہیں دی مگر گزشتہ کچھ عرصہ میں ارض پاک پر جہالت اور اخلاقی گراوٹ کے کچھ ایسے نمونے دیکھنے کو ملے ہیں کہ انہیں دیکھ کر انسانی عقل تو حیرت میں ہے ہی شائد درندے بھی اس سے شرما جائیں کیوں کہ ہم دیکھتے ہیں کہ درندے اور جانور بھی اپنے بچوں سے پیارومحبت کرتے ہیں اور ان کی ذراسی تکلیف بھی برداشت نہیں کرتے مگر ایبٹ آباد کے ندیم کے سرپر تو جیسے شیطان ہی سوار تھا جس نے ایک جعلی عامل کے کہنے پر اپنے من کی مراد کیلئے اپنی بین کا گھر اجاڑدیا اور اپنے ننھے منے تین بھانجوں کی شہہ رگوں پر چھری چلادی اس سے ٹھیک ایک دن قبل بھی ایک جعلی عامل نے ملتان کے ایک رہائشی کی عقل پر ایسا پردہ ڈالا کہ وہ راتون رات امیر ہونے کیلئے خزانے کی تلاش میں اپنے گھر میں کنواں کھود کر خود ہی اس میں دفن ہوگیا اور اسی ہفتے یہ اندوہناک خبر بھی سامنے آئی کہ بھکر کے آدم خور دو بھائیوں نے جیل سے رہائی کے بعد مردہ خوری کا سلسلہ پھر وہیں سے ہی شروع کردیا جہاں سے انہوں گزشتہ بار گرفتاری کے وقت ختم کیا تھا اس بار ان کے قبضے سے ایک بچے کا سر بھی برآمد ہوا جس کو یہ انسان نما گِدھ نوچ رہے تھے ۔

(جاری ہے)

اس سے قبل لاہور اور ظفروال میں پانچ سالہ بچوں کو زیادتی کے بعد قتل کی خبروں نے بھی بیشمار حساس دلوں کو زخمی کیا مگر ایک ماں کے ہاتھوں اپنے ہی دو بچوں کی ہلاکت نے تو سر ہی گھمادیا کہ ہمارا معاشرہ آخر کس طرف جارہا ہے اور اس کا قصوروار اصل میں ہے کون ؟
میرے خیال میں اس بدترین معاشرتی اخلاقی انحطاط کی وجوہات میں سب سے پہلی اور بڑی وجہ اسلامی تعلیمات سے دوری ہے کیوں کہ اسلام وہ عظیم الشان مذہب ہے جو پوری دنیا کیلئے رحمت وسلامتی کا پیغام بن کرآیاہے اور اپنے بدترین دشمنوں کے ساتھ بھی ایسی بدسلوکی سے منع فرماتا ہے جیسے مظاہرے آج کل دیکھنے میں آرہے ہیں کہ ایک ماں ہی اپنے بچوں کی دشمن اورقاتل بن جاتی ہے اگر یہی ماں اسلام کے اس زریں سبق اور اصول لا تقنطو من رحمة اللہ( اللہ کی رحمت سے کبھی مایوس نہ ہوں)سے واقف ہوتی تو کبھی بھی کسی بھی قسم کے حالات سے تنگ آکر وہ اپنے جگر کے ٹکڑوں کا گلا نہ گھونٹتی ۔

اسی طرح اگر ملتان کے نور عالم اور ایبٹ آباد کے ندیم کا یہ ایمان ہوتا کہ دولت اور اولاد سمیت ہر نعمت صرف اور اللہ کے در سے ملتی ہے اس کے آگے جھکنے سے ہی ملتی ہے نہ کہ کسی کی گود اجاڑنے سے یا کسی جعلی عامل کے کہنے پر پچاس فٹ گہرا گڑھا کھودنے سے تو وہ یقیناََ ایسے قبیح افعال سے باز رہتے ۔اس کے بعد دوسرے نمبر پر اس جیسے واقعات کی ذمہ داری ریاست پر عائد ہوتی ہے جو اپنے عوام کو صحت،خوراک اور تعلیم جیسی بنیادی ضروریات فراہم کرنے ذمہ دار ہوتی ہے اور اسی لئے ہی ریاست کو عوام کی ماں بھی کہا جاتا ہے جو اپنے سب بچوں کو ایک ہی نظر سے دیکھتی ہے اس کی گود سب بچوں کو ایک جیسا پیار اور اس کی آنکھیں ہر بچے کیلئے ایک ہی جیسی بیتابی رکھتی ہیں مگر ہماری ''ماں ''کا یہ عالم ہے کہ یہ نہ تو اپنے تمام بچوں کو انصاف فراہم کرتی ہے اور نہ ہی ایک جیسی تعلیم و تربیت اور مناسب ماحول اور یہیں سے ہی ایک ایسی معاشرتی تفریق کی بنیاد پڑتی ہے جو امیر و غریب کے درمیان فاصلوں کو بہت زیادہ بڑھا دیتی ہے اور ہمارا نظام بھی امیر کو ہی سپورٹ کرتا ہے اورپاکستان میں یہ فقرہ مشہورعام ہے کہ ''قانون صرف غریبوں کیلئے ہوتا ہے نہ کہ امیروں اورطاقتوروں کیلئے''۔

عوام کی اس اجتماعی سوچ کے پیچھے ہماری حکومتوں کی وہ بے عملی اور وعدہ خلافی ہے جو اس نے عوام سے ملک میں اسلامی قوانین کے عملی نفاذ کاوعدہ پورانہ کرکے کی ہے کہنے کو تو ملک میں سپریم لا ء کی حیثیت اسلام کو ہی حاصل ہے مگر عملی طور پر معاملہ اس کے برعکس ہے اور باوجود اس کے کہ آئین میں یہ وعدہ کیا گیا ہے کہ اسلام ملک کا سپریم لا ہو گامگر ملک میں سات سو سے زائد قوانین ایسے نافذ ہیں جو اسلامی تعلیمات کے بالک منافی ہیں ۔

ہمارے آئین میں تو یہ بھی درج ہے کہ ہم اپنے بچوں کو اور خود بھی اسلامی تعلیمات دینے اور عربی سمجھنے و پڑھانے کے ذمہ دار ہیں مگر ایسا نہ کرکے حکومت خود ایسے جاہلانہ واقعات کو دعوت دے رہی ہے اس کے ساتھ ساتھ ایسے لرزہ خیز واقعات کی ذمہ داری خودعوام پر بھی عائد ہوتی ہے جو ہر بار ایسے نمائندوں کو منتخب کرکے ایوانوں میں بھیجتے ہیں جو اپنی تنخواہوں و مراعات اور اپنی تاحیات سیکیورٹی جیسے بل تو بڑے خشوع و خضوع کیساتھ اور راتوں رات اسمبلیوں سے پاس کروا لیتے ہیں مگر جعلی عاملوں اور مردہ خوروں سے عوام کو بچانے کیلئے اور ان کو سخت ترین سزائیں دلوانے کیلئے کوئی کوشش نہیں کرتے ان کیلئے کوئی قانون سازی نہیں کرواتے بھکر کے مردہ خوروں کی محض ایک سال بعد ہی رہائی ان نام نہاد عوامی نمائندوں کی مجرمانہ غفلت کی ایک بدترین مثال ہے کہ تین سال قبل یہ واقعہ سامنے آیا تو پورا پاکستان دہل کے رہ گیا کہ مرنے کے بعد بھی کسی کو چین نصیب نہیں اور ہر طرف سے یہ مطالبات سامنے آئے کہ ان درندوں کو عبرتناک سزا دی جائے مگر سزا کیسی اس بارے کوئی قانون تھا نہ اور نہ ہی اب تک بن پایاجس کا نتیجہ یہ ہوا کہ ان درندوں نے ایک سال بعد ہی رہائی کے بعد واپس آکر پھر مردہ خوری شروع کردی ۔

سب سے آخری بات یہ کہ اگر پاکستان کے تمام مالدار لوگ اپنے نصاب کے مطابق پوری زکواة حق داروں تک پہنچانی شروع کردیں تو میں پورے وثوق سے کہہ سکتا ہوں کہ پاکستان میں کوئی غریب نہ رہے اور یہ کون نہیں جانتا کہ غربت و مفلسی سے اللہ کے رسول ﷺ نے بھی پناہ مانگی تھی کیوں کہ یہ انسان کو کفر تک لے جاتی ہے ۔ایک اور جگہ آپ نے فرمایا کہ ''ہر امت کا کوئی نہ کوئی فتنہ ہوتا ہے اور میری امت کا فتنہ مال ہے''لہٰذا اگر ہر شخص اپنا قبلہ دولت کو بنانے کی بجائے انسانیت کی خدمت کوبنا لے اور اپنے عزیز و اقارب اور پڑوسیوں کی ضرورتوں کو بھی اپنی بساط کے ممطابق پورا کرتا رہے تو بھی ایسے دلخراش واقعات سے کافی حدتک بچا جاسکتا ہے ۔