عوام کے خوابوں کو تعبیر دینے والی قیادت

قائد وہ ہے جو عوام کے خوابوں کو حقیقت کا رنگ دے سکتا ہو۔  چینی عوام کی خوش قسمتی ہے کہ موجودہ تاریخ میں انہیں  وہ قائدین ملے جو ان  کے دلوں کو بات کو سمجھ سکتے ہیں۔ اگر ہم آج کے چین کی بات کریں تو چینی کمیونسٹ پارٹی اور چینی عوام کو جناب شی جن پھنگ کی مثالی رہنمائی  حاصل ہے۔چینی صدر شی جن پھنگ کی قیادت میں کمیونسٹ پارٹی آف چائنا نے مثالی کامیابیاں حاصل کی ہیں۔

اس جماعت نے زندگی کے تمام  شعبہ جات میں ترقی کی نئی منازل طے کیں ہیں۔ جماعت کو جناب شی جن کی ولولہ انگیز قیادت میں جدید خطوط پر استوار کیا گیا ہے۔ جناب شی  کی ہدایات پر  چینی  کمیونسٹ پارٹی کی  مرکزی کمیٹی  مضبوط سیاسی جرات اور  ذمہ داری کا مظاہرہ کرتے ہوئے پارٹی میں شفاف سیاسی ماحول اور بدعنوانی کے جڑ سے خاتمے کے لیے بھر پور کوشاں ہے ۔

(جاری ہے)

ایک شفاف اور دیانت دار حکومت کی تشکیل میں کامیابی اور بدعنوانی کے خلاف  جنگ میں حاصل شدہ فتح کے باعث لوگوں کے دلوں میں چینی کمیونسٹ پارٹی کے لئے مزید اعتماد اور حمایت کو تقویت ملی ہے اور عوام کی جانب سے  حکومتی اقدامات  کو بھرپور سراہا جا رہا ہے۔
شی جن پھنگ 2012 کے اواخر میں چینی کمیونسٹ پارٹی (سی پی سی) کی مرکزی کمیٹی کے جنرل سیکرٹری منتخب ہوئے تھے۔

اُن کے دور  کی ایک خاص بات جہاں چین کو عصر حاضر کے تقاضوں کے مطابق تمام شعبہ جات میں عالمی سطح پر ایک نمایاں مقام پر فائز کرنا رہی ، وہاں انہوں نے ملکی سطح پر دیہی تعمیر و ترقی کو فروغ دینے کے لیے "دیہی حیات کاری" کا ایک نیا ماڈل پیش کیا۔گزشتہ نو برسوں کے دوران شی جن پھنگ نے ملک کے مختلف علاقوں کے 80 سے زائد دورے کیے جن میں دیہی علاقوں کی ایک بڑی تعداد بھی شامل ہے۔

حال ہی میں شی جن پھنگ نے کم ترقی یافتہ صوبہ گیوئی جو کا دورہ کیا جو اس بات کی علامت ہے کہ وہ ترقی کے سفر میں گیوئی جو کو دیگر ترقی یافتہ صوبوں کے ہم پلہ دیکھنا چاہتے ہیں۔ پوری چینی کمیونسٹ  پارٹی  اور نسلی گروہوں کے تمام لوگوں کی مشترکہ کاوشوں کے ذریعہ ، چین  نے غربت کے خلاف کے جنگ میں مکمل فتح حاصل کرلی ہے۔موجودہ معیارات کے مطابق ، 98.99 ملین دیہی غریب لوگوں کو غربت سے نکالا گیا ہے ۔

تمام 832 غریب کاؤنٹیوں ، اور تمام ایک لاکھ  اٹھائیس سو غریب دیہات  کو غریب علاقوں کی فہرست سے نکال دیا گیا ہے اور پورے ملک میں انتہائی  غربت کے خاتمے کا ہدف  مکمل کرلیا گیا ہے۔
چینی صدر شی جن پھنگ نے جولائی دو ہزار بیس میں صوبہ جی لین کے دورے کے موقع پر یہ خیال ظاہر کیا کہ " ہم دو  صد سالہ اہداف  کی تکمیل کے لیے جاری جدوجہد کے تاریخی موڑ پر کھڑے ہیں۔

ہم چین کے مستقبل کے حوالے سے پر اعتماد  ہیں: چین یقینی طور پر بہتر  سے بہترین کی راہ پر گامزن ہوگا ، اور لوگوں کی زندگیاں زیادہ سے زیادہ خوشحال ہوں گی۔ "
اگر ہم موجودہ عہد کی بات کریں تو رواں سال چین کے " چودہویں پانچ سالہ منصوبے " کے آغاز کا سال ہے ۔ چین نئی ترقی کے مرحلے میں داخل ہو رہا ہے ۔ چینی صدر مملکت شی جن پھنگ نے بذات خود " چودہویں پانچ سالہ منصوبے " کے ترقیاتی اہداف طے کرتے ہوئے ایک جامع سوشلسٹ جدید  چین کے قیام  کا  ایک نیا بلیو پرنٹ تشکیل دیا۔

اس سے نیا ترقیاتی ڈھانچہ ، سمت اور  طریقہ کار  وضع ہوا ہے ۔ صدر شی جن پھنگ نے تیرہ اپریل دو ہزار بیس کو " چودہویں پانچ سالہ منصوبے " کی تیاری کے حوالے سے ایک اجلاس میں کہا کہ "چودہویں  پانچ سالہ منصوبے" کا عرصہ چین میں جامع  خوشحال معاشرے کے قیام کے بعد دوسرے  صد سالہ ہدف کی تکمیل کے لیے جدوجہد  کے پہلے پانچ سال ہیں، یہ چین کی ترقی کے لیے غیر معمولی موقع سے فائدہ اٹھانے ، مختلف چیلنجوں کا مقابلہ کرنے اور  ترقی کی صلاحیت کو وسعت دینے کا اہم کلیدی عرصہ   بھی ہے ۔

اس پانچ سالہ منصوبے میں معاشی اور معاشرتی ترقی کے تمام پہلوؤں کو شامل کیا گیا ہے، لوگوں کے معاش اور روزمرہ زندگی سے بھی اس کا گہرا تعلق ہے۔جیساکہ پانچ تاریخ کو   منعقدہ تیرہویں قومی عوامی کانگریس کے چوتھے اجلاس کی افتتاحی تقریب میں چینی وزیر اعظم لی کھ چھیانگ نے اپنی حکومتی ورک رپورٹ میں کہا کہ "14 ویں پانچ سالہ منصوبے" کی مدت کے دوران ، چین مشترکہ خوشحالی کو فروغ دینے کے لئے ایک ایکشن پلان مرتب کرے گا ،  جس کے تحت روز گار کے مواقع میں اضافہ  ہو گا ، شہریوں کی فی کس ڈسپوزایبل آمدنی جی ڈی پی کے  ساتھ ہم آہنگ ہوگی ، دیہی حیات کاری کی حکمت عملی پر بھرپورعمل درآمد کیاجائے گا ، زراعت کی مستحکم ترقی کو فروغ  دیا جائے گا اور کسانوں کی آمدنی میں اضافہ  ہو گا ۔

غربت سے نجات حاصل کرنے والے علاقوں کی ترقی جاری رکھی جائے گی ۔حکومتی ورک رپورٹ ایسے ترقیاتی اہداف اور مضبوط عزائم سے بھری پڑی ہے ۔ ان تمام باتوں سے چینی کمیونسٹ پارٹی کے ابتدائی مقصد اور مشن کا اظہار کیا گیا ہے کہ چینی عوام کی خوشحالی اور چینی قوم کی نشاۃ ثانیہ کے لیے جدوجہد کی جائے ۔ ترقی عوام کے لئے ہے ، اور  ترقی کے ثمرات بھی عوام میں ہی تقسیم ہوں گے جس سے چینی عوام کو  مزید مفادات   ، خوشحالی اور سلامتی  میسر آ سکے گی ۔