کراچی،مختلف علاقوں میں بارش نے گرمی کا زور توڑ دیا

پیر 1 ستمبر 2014 20:30

کراچی(اُردو پوائنٹ اخبار تازہ ترین۔1ستمبر۔2014ء) شہر کے مختلف علاقوں میں ہونے والی بارش نے گزشتہ کئی روز سے جاری گرمی کا زور توڑ دیا ہے۔ تفصیلات کے مطابق کراچی میں گزشتہ کئی روز سے موسم گرم تھا،لیکن اچانک ہی گرم موسم کی جگہ گہرے سیاہ بادلوں نے لے لی اور پھر دیکھتے ہی دیکھتے ہلکی بارش کا سلسلہ شروع ہوگیا ۔صدر، جٹ لائن، منظور کالونی، محمود آباد، کورنگی، کلفٹن اور ڈیفنس کے مختلف علاقوں میں تیز جبکہ ایم اے جناح روڈ اور آئی آئی چندریگر روڈ سے ملحقہ علاقوں میں ہلکی بارش ہوئی، جس سے گرمی کے مارے لوگوں کے چہروں پر خوشیاں دوڑ گئیں، موسم سے لطف اندوز ہونے کے لئے لوگوں کی بڑی تعداد میں اپنے کاروبار بند کرکے سڑکوں پر نکل آئی جبکہ منچلوں نے ساحل سمندر کا رخ کیا تاہم کراچی کی شہر ی انتظامیہ کی جانب سے پابندی کی بدولت ان کی خواہش ادھوری رہ گئی، بارش کے مزے کو دوبالا کرنے کے لئے کھانے کی پینے کی دکانوں پر بھی عوام کا رش دیکھا جارہا ہے۔

(جاری ہے)

بارش سے جہاں شہر قائد کا موسم خوشگوار ہوگیا ہے وہیں شہری انتظامیہ کی کارکردگی کا بھی پول کھل گیا ہے، کئی علاقے پانی میں ڈوب گئے ہیں جبکہ برساتی نالوں کی صفائی نہ ہونے کی وجہ سے سڑکوں سے پانی کی نکاسی بھی نہیں ہورہی۔ دوسری جانب شہر کا بڑا حصہ بجلی سے بھی محروم ہوگیا ہے، کے الیکٹرک کی انتطامیہ کا کہنا ہے کہ بارش کے باوجود ان کی جانب سے شہر کو بلا تعطل بجلی کی فراہمی کو یقینی بنایا جارہا ہے تاہم بعض مقامات پر بارش کے باعث کیبل فالٹس ہوئے ہییں جنہیں جلد ہی دور کردیا جائے گا۔

Facebook Twitter Google + Share on Whatsapp

کراچی،مختلف علاقوں میں بارش نے گرمی کا زور توڑ دیا

متعلقہ عنوان :

مزید مقامی خبریں