آئندہ 48 گھنٹوں کے دوران سندھ ، بلوچستان، پنجاب ، خیبر پختونخوا، فاٹا اور کشمیر میں کہیں کہیں آندھی/تیز ہواوٴں اور گرج چمک کے ساتھ مون سون بارشوں کا امکان ہے، محکمہ موسمیات

اسلام آباد ۔ 27 جون (اُردو پوائنٹ اخبارتازہ ترین - اے پی پی۔27 جون۔2016ء) مون سون ہوائیں بتدریج پاکستان میں داخل ہو رہی ہے جو ملک کے مختلف علاقوں میں بارش کا سبب بنیں گی جبکہ کراچی میں سمندری ہواؤں کی بندش سے حبس کی شدت میں اضافہ ہو گا۔ محکمہ موسمیات نے آئندہ 48 گھنٹوں کے دوران سندھ ، بلوچستان، پنجاب ، خیبر پختونخواہ، فاٹا اور کشمیر میں کہیں کہیں آندھی/تیز ہواوٴں اور گرج چمک کے ساتھ مون سون بارشوں کی پیشنگوئی کی ہے۔

رپورٹ کے مطابق مکران، قلات، سبی، نصیرآباد ڈویژن میں اکثر مقامات پر جبکہ راولپنڈی، گوجرانوالہ، لاہور، سرگودھا، فیصل آباد، ساہیوال، بہاولپور، ملتان، ڈی جی خان ڈویژن، اسلام آباد، میرپور خاص، حیدر آباد، کراچی، سکھر، شہید بینظیر آباد ڈویژن، ہزارہ، مالاکنڈ، پشاور، کوہاٹ، مردان، بنوں، ڈی آئی خان ڈویژن، فاٹا، کوئٹہ، ژوب ڈویژن، کشمیر اور گلگت بلتستان میں کہیں کہیں آندھی/تیز ہواوٴں اور گرج چمک کے ساتھ بارش کا امکان ہے۔

(جاری ہے)

چند مقامات پر موسلادھار بارش کا بھی امکان ہے۔ محکمہ موسمیات کے مطابق گزشتہ24گھنٹوں کے دوران ملک کے بیشتر علاقوں میں موسم گرم اور خشک رہا۔ تاہم سرگودھا، گوجرانوالہ، راولپنڈی، مالاکنڈ، کوئٹہ ڈویژن، کشمیر، اسلام آباد اور فاٹا میں چند مقامات پر تیز ہواوٴں اور گرج چمک کے ساتھ بارش ہوئی۔ سب سے زیادہ بارش پاراچنارمیں 50 ملی میٹر، دیر2، سرگودھا56، چکوال16، اسلام آباد 6، منڈی بہاولدین 12، کوٹلی4، اور بارکھان میں ایک ملی میٹر ریکارڈ کی گئی۔