سندھ اور جنوبی پنجاب کی طرح شہر قائد شدید گرمی کی لپیٹ میں آگئے ،ْ پارہ بھی مسلسل بڑھنے لگا

کراچی(اُردو پوائنٹ اخبارتازہ ترین - این این آئی۔ 12 اپریل2017ء) سندھ اور جنوبی پنجاب کی طرح شہر قائد شدید گرمی کی لپیٹ میں آگئے ،ْ پارہ بھی مسلسل بڑھنے لگا ۔محکمہ موسمیات کے مطابق کراچی میں سمندری ہوائیں بند ہونے سے میدانی علاقوں سے آنے والے ہوا کے گرم تھپیڑوں سے مسلسل تیسرے روز درجہ حرارت 40 سے تجاوز کرگیا ،ْ شدید گرمی اور کے الیکٹرک کی جانب سے غیر اعلانیہ لوڈ شیڈنگ کے باعث شہریوں کی زندگی اجیرن ہوگئی ۔

(جاری ہے)

محکمہ موسمیات نے کہا کہ شہر کا درجہ حرارت 42 ڈگری سے تجاوز کرسکتا ہے تاہم ہیٹ اسٹروک کا خدشہ نہیں تاہم اس کے باوجود شہری احتیاط برتیں اور شام 4 بجے تک اپنے گھروں یا دفاتر سے باہر نہ نکلیں، باہر نکلنے کی صورت میں اپنے سر کو اچھی طرح ڈھانپ لیں اس کے ساتھ ساتھ اپنے ہمراہ پانی یا کوئی مشروب بھی رکھیں تاکہ وقفے وقفے سے اس کا استعمال کیا جاسکے۔محکمہ موسمیات کے مطابق دن 12 بجے تک حیدر آباد، رحیم یار خان اور شہید بے نظیر آباد میں 43، موہن جوداڑو، لاڑکانہ اور دادو میں 42، لسبیلہ اور سکھر میں 41، مٹھی 40 جب کہ کراچی میں 39 ڈگری سینٹی گریڈ ریکارڈ کیا گیا اوراس میں مزید اضافہ ہوگا۔