اسلام آباد ،ْپنجاب، خیبرپختونخوا اور بلوچستان کے مختلف شہروں میں بارش،

موسم خوشگوار ہوگیا محکمہ موسمیات کی اسلام آباد، پنجاب، ڑوب، خیبرپختونخوا، فاٹا، گلگت بلتستان اور کشمیر میں مزید بارش کی پیش گوئی

پیر 16 اپریل 2018 15:17

اسلام آباد ،ْپنجاب، خیبرپختونخوا اور بلوچستان کے مختلف شہروں میں ..

اسلام آباد (اُردو پوائنٹ اخبارتازہ ترین۔ 16 اپریل2018ء) وفاقی دارالحکومت اسلام آباد سمیت پنجاب کے مختلف شہروں میں بارش کے بعد موسم خوشگوار ہوگیا ۔تفصیلات کے مطابق اسلام آباد ،ْ راولپنڈی، لاہور، ملتان،جہلم، گوجرانوالہ، ڈیرہ غازی خان، راجن پور اور جہلم میں کہیں تیز اور کہیں ہلکی بارش ہوئی جس کے بعد گرمی کا زور ٹوٹ گیا۔ خیبرپختونخوا میں پشاور، مانسہرہ، بٹگرام، ضلع لوئر دیر، دیر بالا، سوات اور گرد و نواح میں بارش کا سلسلہ وقفے وقفے سے جاری رہا ،ْ کوہستان اور تور غر میں بھی بارش ہوئی جس کے بعد موسم خوشگوار ہوگیا۔

بلوچستان میں کوئٹہ سمیت مختلف علاقوں میں برسات ہوئی جبکہ نوشکی، چمن اور قریبی پہاڑوں پر بارش کے باعث ندی نالوں میں طغیانی ہے۔ضلع نوشکی اور قریبی پہاڑوں پر بارش کے باعث خیصارندی میں سیلابی ریلہ آگیا جس کے بعد شہر کا کلی شریف خان، کلی صاحبزادہ، کلی جمالدینی سمیت مختلف دیہات سے رابطہ منقطع ہوگیا۔

(جاری ہے)

کشمیر میں وادی نیلم کے اٹھ مقام سمیت شاردہ کیل، بالائی وادی نیلم، پیرنسوڑہ، جند روٹ، نکیال غربی، پیر کلنجر اور ترکنڈی کے گرد و نواح میں بارش اور پہاڑیوں پر برفباری ہوئی۔

محکمہ موسمیات نے اسلام آباد، پنجاب، ڑوب، خیبرپختونخوا، فاٹا، گلگت بلتستان اور کشمیر میں مزید بارش کی پیش گوئی کی ہے۔محکمہ موسمیات نے کہا کہ کراچی اور اندرون سندھ میں آئندہ 24 گھنٹوں کے دوران موسم گرم اور خشک رہنے کا امکان ہے جبکہ شہر قائد کا کم سے کم درجہ حرارت 27 ڈگری سینٹی گریڈ ریکارڈ کیا گیا اور زیادہ سے زیادہ درجہ حرارت 35 سے 37 ڈگری سینٹی گریڈ رہنے کا امکان ہے۔