پنجاب پیپلزپارٹی کا قلعہ تھا، ہے اور رہے گا،جیالے اور جانثار بھرپور قوت سے آئندہ انتخابات لڑیں گے،آصف علی زرداری کی پی پی رہنمائوں سے گفتگو

جمعرات 19 اپریل 2018 00:10

اسلام آباد ۔18 اپریل(اُردو پوائنٹ اخبارتازہ ترین - اے پی پی۔ 19 اپریل2018ء) پاکستان پیپلزپارٹی پارلیمنٹیرین کے صدر آصف علی زرداری نے کہا ہے کہ پنجاب پیپلزپارٹی کا قلعہ تھا، ہے اور رہے گا، جیالے اور جانثار بھرپور قوت سے آئندہ انتخابات لڑیں گے۔ بدھ کے روز زرداری ہائوس میں پیپلزپارٹی کے رہنمائوں جڑانوالہ سے سابق ایم پی اے رائے محمد شاہجہان خان کھرل، رائے عمر کھرل، رائے فیصل ریاض کھرل اور محمد اسلم نے ملاقات کی۔

اس موقع پر پیپلزپارٹی سنٹرل پنجاب کے صدر قمر زمان کائرہ بھی موجود تھے۔ رائے محمد شاہجہان کھرل نے سابق صدر کو یاد دلایا کہ محترمہ بینظیر بھٹو شہید نے جڑانوالہ کو گیس اور دیہات کو بجلی کی سہولیات فراہم کیں۔ جڑانوالہ کے عوام محترمہ بینظیر بھٹو کا یہ احسان کبھی نہیں بھولے۔

(جاری ہے)

انہوں نے آصف علی زداری کو لنڈیانوالہ آنے کی دعوت بھی دی جو سابق صدر نے قبول کر لی۔

آصف علی زرداری نے وفد کو ہدایت کہ کہ وہ پارٹی عہدیداروں اور کارکنوں کو متحرک کریں تاکہ وہ گھر گھر جا کر پارٹی کے چیئرمین بلاول بھٹو زرداری کا پیغام پہنچائیں۔ انہوں نے کہا کہ پیپلزپارٹی عوام کی طاقت پر یقین رکھتی ہے اور عوام کا مینڈیٹ لے کر اقتدار میں آتی ہے۔ پیپلزپارٹی دوبارہ اقتدار میں آکر نوجوانوں کے لئے ملازمتوں کے مواقع فراہم کرے گی تاکہ بیروزگاری کا خاتمہ ہو۔