گورنر سندھ محمد زبیر نے 17 ویں سندھ گیمز کا افتتاح کر دیا

6 برس بعد منعقد ہونے والے سندھ گیمز میں کھلاڑیوں کو اپنی صلاحیتیں منوانے کا بھرپور موقع حاصل ہوگا، محمد زبیر

جمعرات 19 اپریل 2018 22:59

گورنر سندھ محمد زبیر نے 17 ویں سندھ گیمز کا افتتاح کر دیا
کراچی ۔ (اُردو پوائنٹ اخبارتازہ ترین - اے پی پی۔ 19 اپریل2018ء) گورنر سندھ محمد زبیر نے مشعل روشن کرکے 17 ویں سندھ گیمز کا افتتاح کر دیا۔ اس موقع پر صوبائی وزیر کھیل سردار محمد بخش مہر ، سیکریٹری کھیل و امور نوجوانان ڈاکٹر نیاز عباسی ، صوبہ سے تعلق رکھنے والے لیجنڈز کھلاڑی ، سندھ گیمز میں حصہ لینے والے کھلاڑی، عمائدین شہر اور کھیلوں کے شائقین کی بڑی تعداد موجود تھی ۔

اس سے قبل کھیلوں کے میدان میں کارہائے نمایاں انجام دینے والے ایتھلیٹس مزار قائد سے مختلف راستوں سے ہوتے ہوئے کو چنگ سینٹر پہنچے جہاں اسکواش لیجنڈ جہانگیرنے مشعل گورنرسندھ کے حوالہ کی ،گورنرسندھ نے مشعل معروف اولمپئن اصلاح الدین کو دی جنہوں نے ممتاز ایتھلیٹ معید بلوچ کے ہمراہ گورنرسندھ کی اجازت سے مشعل روشن کی۔

(جاری ہے)

اس موقع پر گورنر سندھ نے کہا کہ 6 برس بعد منعقد ہونے والے سندھ گیمز میں کھلاڑیوں کو اپنی صلاحیتیں منوانے کا بھرپور موقع حاصل ہوگیا ہے ،کھلاڑی اپنی مہارت ، صلاحیت ،محنت اور لگن سے ہی نمایاں مقام حاصل کرسکتے ہیں ، سندھ کے کھلاڑی بہت با صلاحیت ہیں ،سندھ گیمز میں حصہ لینے والے کھلاڑیوں کو دنیا میں مقام اور پاکستان کا نام روشن کرنا ہے، سندھ گیمز میں فاتح کھلاڑی اپنے شہر جا کر ایک نئے جوش، جذبہ اور ولولہ کے ساتھ قومی اور پھر عالمی مقابلوں کی تیاری شروع کریں ۔

انہوں نے کہا کہ فخر سے کہتا ہوں کہ قومی ترقی کی شہ رگ کراچی کی رونقیں بحال ہو چکی ہیں ،شہر میں پاکستان سپر لیگ فائنل اور ویسٹ انڈیز کے ساتھ ٹی ٹونٹی سیریز میں لوگوں کے جوش وخروش نے یہ بات ثابث کردی ہے کہ پر امن شہر کے مکین کھیلوں سے والہانہ محبت رکھتے ہیں ، شہر میں ایک کے بعد ایک کھیلوں کے مقامی و بین الاقوامی مقابلے جاری ہیں، مجھے امید ہے کہ ہم سب مل کر اقوام عالم میں کراچی کو امن پسند اور کھیلوں کے حب کے طور پر نمایاں مقام دلانے میں کامیاب ہو جائیں گے۔

انہوں نے کہا کہ کراچی کے شہری بجا طور پر مبار ک باد کے مستحق ہیں کہ جس طرح کرکٹ کے دونوں بڑے ایونٹس میں مہمان نوازی کا ثبوت دیا اسی طرح صوبہ بھر سے آئے ہوئے کھلاڑیوں کو بھی خوش آمدید کہنے کے ساتھ ساتھ گیمز کے اختتام تک مہمان نوازی کا حق ادا کرینگے اور لوگوں کو قریب لانے اور ان میں محبت اور یکجہتی کو فروغ دینے میں اہم کردار ادا کرینگے ۔

گورنرمحمد زبیر نے کراچی کے شہریوں کو مخاطب کرتے ہوئے کہا کہ کراچی محبت کرنے والوں کا شہر ہے ، کراچی کے مکین سندھ گیمز میں اپنی فیملی کے ساتھ شرکت کریں اور شہر کے 15 مقامات پر ہونے والے مقابلوں میں ہمارے مستقبل کے معماروں کی بھرپور حوصلہ افزئی کریں ، مجھے یقین ہے کہ دوسرے شہروں سے آنے والے کھلاڑی اور آفیشلز یہاں سے خوشگوار یادیں لے کر جائیں گے ۔

گورنرسندھ نے صوبائی وزیر کھیل ، سیکریٹری ، بوائے اسکائوٹس ، شہری اداروں با الخصوص پولیس کو مبارک باد دیتے ہوئے کہا کہ ان کی محنت، لگن اور کھیل سے والہانہ محبت سے ہی سندھ گیمز کا انعقاد یقینی ہوا۔واضح رہے کہ 4 روزہ گیمز میں سندھ بھر سے 3 ہزار سے زائد مرد و خواتین کھلاڑی حصہ لے رہے ہیں ، سندھ گیمز میں مردوں کے 30 اور خواتین کے 17 مقابلے شہر کے 15 مختلف مقامات پرکرائے جا رہے ہیں ۔

تقریب سے خطاب میں صوبائی وزیر سردار محمد بخش مہر نے کہا کہ ہماری حتی الامکان کوشش ہے کہ سندھ گیمز میں شریک کھلاڑیوں ، آفیشلز اور ٹیکنیکل آفیشلز کو رہائش ، ٹرانسپورٹ سمیت کھیلوں کے وینیو ز پر بہترین شہولیات فراہم کی جائیں ، ہر وینیو پر ڈاکٹر کی ٹیم اور ایمبولینس کی موجودگی کو بھی یقینی بنایا گیا ہے جبکہ کھلاڑیوں کی سیکیورٹی کو یقینی بنانے کے لئے سندھ رینجرز ، پولیس اور دیگر قانون نافذ کرنے والے اداروں کے اہلکارڈیوٹی انجام دیں گے ۔ سیکریٹری اسپورٹس ڈاکٹر نیاز عباسی نے 17 ویں سندھ گیمز کے انعقاد پر تمام متعلقہ اداروں کے تعاون کا شکریہ ادا کیا۔