پوری قوم جانتی ہے کہ نواز شریف محسن پاکستان ہیں، عمران خان کی بات کو کوئی سنجیدہ نہیں لیتا، انہیں صرف وزیراعظم بننے کا شوق ہے

مسلم لیگ (ن) کے رہنما سینیٹر چوہدری تنویر خان کی پارلیمنٹ ہائوس کے باہر میڈیا سے گفتگو

پیر 30 اپریل 2018 21:13

اسلام آباد ۔ (اُردو پوائنٹ اخبارتازہ ترین - اے پی پی۔ 30 اپریل2018ء) مسلم لیگ (ن) کے رہنما سینیٹر چوہدری تنویر خان نے کہا ہے کہ پوری قوم سمجھتی ہے کہ نواز شریف محسن پاکستان ہیں، عمران خان کا لاہور کا جلسہ اچھا تھا مگر لوگ وہاں کے نہیں تھے، ان کی بات کو کوئی سنجیدہ نہیں لیتا، انہیں صرف وزیراعظم بننے کا شوق ہے۔ پیر کو پارلیمنٹ ہائوس کے باہر میڈیا سے گفتگو کرتے ہوئے سینیٹر چوہدری تنویر نے کہا کہ جن لوگوں نے عمران خان کو لاہور جلسے میں دو لاکھ لوگوں کا مجمع جمع کرنے کا ٹارگٹ دیا تھا ان کو مایوسی ہوئی، اتنے لوگ جمع نہیں ہو سکے، کسی میڈیا چینل نے لوگوں کی تعداد ساٹھ ہزار سے زیادہ نہیں بتائی۔

انہوں نے کہا کہ عمران خان کی آج کی اور گزشتہ تقریر کی ویڈیو نکالیں تو پتہ چلے گا ان میں سنجیدگی نہیں۔

(جاری ہے)

سینیٹر چوہدری تنویر نے کہا کہ عمران خان ملکی ترقی میں سب سے بڑی رکاوٹ ہیں، لاہور جلسہ اچھا تھا مگر جلسے میں لاہور کے عوام نہیں بلکہ پشاور کے لوگ زیادہ تھے، اگر پارٹی مجھے عوام کو جمع کرنے کے لئے اتنا ٹارگٹ دے تو میں اس سے بھی زیادہ لوگوں کو جمع کر کے دکھا سکتا ہوں۔

انہوں نے کہا کہ عمران خان کو صرف وزیراعظم بننے کا شوق ہے، آج جو حالات کے پی کے میں ہیں، اس کو دنیا دیکھ رہی ہے،عمران خان وہاں کیا تبدیلی لے کر آئے ہیں۔ انہوں نے کہا کہ نواز شریف محسن پاکستان ہیں، پوری قوم انہیں جانتی ہے، آئندہ عام انتخابات میں بھی مسلم لیگ کو بھاری اکثریت سے کامیاب بنائیں گے۔