آزادکشمیر میں تمام قبائل عزت و احترام کامقام رکھتے ہیں ،ْراجہ محمد فاروق حیدر

سدھن قبیلے کی تحریک آزادی کشمیر ،جمہوریت اور ریاستی رٹ کی بحالی کیلئے لازوال قربانیں ہیں جنہیں ہم فراموش نہیں کر سکتے ،ْوزیر اعظم آزاد کشمیر

منگل 12 جون 2018 16:14

مظفرآباد(اُردو پوائنٹ اخبارتازہ ترین - این این آئی۔ 12 جون2018ء) وزیر اعظم آزاد حکومت ریاست جموں وکشمیر راجہ محمد فاروق حیدرخان نے کہا ہے کہ آزادکشمیر میں تمام قبائل عزت و احترام کامقام رکھتے ہیں ،بالخصوص و اکابرین جنہوں نے تحریک آزادی کشمیر اور جمہوریت کیلئے قربانیاں دی ہیں ۔ آزادکشمیر میں سدھن قبیلے کی تحریک آزادی کشمیر ،جمہوریت اور ریاستی رٹ کی بحالی کیلئے لازوال قربانیں ہیں جنہیں ہم فراموش نہیں کر سکتے ۔

اپنے ایک بیان میں وزیر اعظم آزادکشمیر نے کہاکہ غازی ملت سردار محمد ابراہیم خان کا نام تحریک آزادی کشمیر کے حوالے سے ہمیشہ یاد رکھا جائیگا۔ مجھے اس بات پر فخرہے کہ ہمارے آبائو اجداد نے ان کے ساتھ ملکر پچاس کی دھائی میں ایک بھرپور جدوجہد شروع کی جس کے نتیجہ میں قانون ساز اسمبلی وجود میں آئی ۔

(جاری ہے)

انہوںنے کہاکہ تحریک آزادی کشمیر میں تمام قبائل نے بڑھ چڑھ کر حصہ لیا لیکن سدھن قبیلے کی جدوجہد تحریک آزادی کشمیر کے حوالے سے بڑی نمایاں رہی ہے ، چند عناصر جن کا تعلق خواہ کسی برادری سے ہو ان کو یہ حق نہیں پہنچتا کہ وہ کسی بھی برادری کے خلاف ہرزہ سرائی کریں اور ان اکابرین کے خلاف با ت کریں جنہوںنے تحریک آزادی کشمیر میں نمایا ںکردار ادا کیا۔

انہوںنے کہاکہ حکومت تحریک آزادی کشمیر کیلئے خدمات سرانجام دینے والوں کو قدر کی نگاہ سے دیکھتی ہے ان میں غازی ملت سردارمحمد ابراہیم خان اور دیگر سرفہرست ہیں ۔