تعلیم ،صحت ،روزگار اورشہرکومجموعی ترقی ہماری پہلی ترجیح ہے ۔ہمارے پاس وژن بھی ہے، حافظ طاہر مجید

بدھ 4 جولائی 2018 23:38

حیدرآباد(اُردو پوائنٹ اخبارتازہ ترین - این این آئی۔ 04 جولائی2018ء) امیرجماعت اسلامی وصدرمتحدہ مجلس عمل ضلع حیدرآباداوراین اے 226کے امیدوار حافظ طاہرمجیدنے کہاہے کہ تعلیم ،صحت ،روزگار اورشہرکومجموعی ترقی ہماری پہلی ترجیح ہے ۔ہمارے پاس وژن بھی ہے اور باصلاحیت اورباکردار افرادکی ٹیم بھی موجودہے۔عوام اپناردعمل 25جولائی کے لیے سنبھال کررکھیں اورایسے لوگوں کوضرورمستردکردیں جنہوں نے حیدرآبادکوتعلیم ،روزگار،صحت اورترقی سے محروم کردیاہے۔

ان خیالات کااظہارانھوں نے این اے 226 اور پی ایس65کے مرکزی الیکشن آفس کاافتتاح ،کرزکنونشن اورعوامی رابطہ انتخابی مہم سے خطاب کرتے ہوئے کیا، حافظ طاہرمجیدنے کہاکہ شہریوں کے مسائل اوران کی پریشانی کاہمیں بخوبی اندازہ ہے محض وعدے کرنااورسبزباغ دکھاناہماری تربیت نہیں ۔

(جاری ہے)

اقتدار اوراختیارکے بغیر بھی الخدمت فائونڈیشن کے ذریعے بلاامتیازخدمت کی اورانتخابات میں کامیابی کے بعدتمام سرکاری وسائل بھرپور اندازمیں حیدرآبادکے لیے استعمال کریں گے، پی ایس 65سے امیدوار سیدناصرعلی کاظمی نے کہاکہ لطیف آبادمیں پانی ،تعلیم ، روزگار اورڈیٹکشن بلوں کے مسائل ہیں ،مقامی نوجوانوں کواعلیٰ تعلیم کی سہولتیں نہ ہونے کے برابرہیں یونیورسٹی کاقیام اورجامشوروکی جامعات میں طلبہ کاکوٹہ بڑھوانا،ڈیٹکشن بلوں کاخاتمہ اور نوجوانوں کوسرکاری اورغیرسرکاری سطح پر روزگارکے مواقع پیداکیے جائیں گے، سابق امیرشیخ شوکت علی نے کہاکہ لسانیت وعصبیت کادورختم ہوگیا،فرقہ واریت اورگمراہ کن نعروں کازمانہ ختم ہوگیا دنیاچاندسے آگے نکل گئی ہے ، معمولی اورغیرضروری اختلافات میں الجھانے والے قوم سے مخلص نہیں ہیں، اب دیانتدار اوربددیانت لوگوں میں مقابلہ ہے۔

قوم کواپنی قسمت بدلنے کاموقع مل رہاہے وہ انتخابات کے دن سونے کے بجائے ووٹ کااستعمال کریں، انھوں نے کہاکہ جماعت اسلامی تعلیم سب کے لیے چاہتی ہے اس لیے ہم شہری اوردیہی یونیورسٹی نہیں ،پبلک یونیورسٹی بناناچاہتے ہیں۔