پاکستان کی جانب سے سخت رویہ اپنانے پر آئی ایم ایف بھی نرم پڑ گیا

مذاکرات ناکام ہو جانے کی تردید، پاکستان کو تاحال قرضہ دینے کا خواہش مند، مزید مذاکرات کرنے کا اعلان کردیا

محمد علی منگل 20 نومبر 2018 22:08

اسلام آباد (اُردو پوائنٹ اخبارتازہ ترین۔ 20 نومبر2018ء) پاکستان کی جانب سے سخت رویہ اپنانے پر آئی ایم ایف بھی نرم پڑ گیا، مذاکرات ناکام ہو جانے کی تردید، پاکستان کو تاحال قرضہ دینے کا خواہش مند، مزید مذاکرات کرنے کا اعلان کردیا۔ تفصیلات کے مطابق بین الاقوامی مالیاتی فنڈ (آئی ایم ایف) اور حکومت پاکستان کے درمیان متوقع پروگرام کیلئے پالیسی و ڈھانچہ جاتی اصلاحات کے فریم ورک بارے اتفاق رائے کے سلسلہ میں نمایاں پیشرفت ہوئی ہے۔

اس ضمن میں مثبت بات چیت جاری رکھی جائے گی۔ آئی ایم ایف کے وفد ہیرالڈ فنگر کی قیادت میں 14 روزہ دورہ پاکستان مکمل کر لیا ہے، 7 سے 20 نومبر کے دوران وفد نے حکومت پاکستان کی کلیدی وزارتوں بشمول وزارت خزانہ، وزارت منصوبہ بندی، ترقی و اصلاحات، وزارت توانائی اور سٹیٹ بینک آف پاکستان کے حکام کے ساتھ مذاکرات کئے۔

(جاری ہے)

ان مذاکرات کے دوران پاکستان کی معیشت کے تقریباً تمام شعبوں پر بات چیت کی گئی۔

علاوہ ازیں ممبران پارلیمنٹ اور صوبائی وزراء خزانہ نے بھی آئی ایم ایف مشن کے ساتھ تبادلہ خیال کیا۔ وفاقی وزیر خزانہ اسد عمر نے منگل کو آئی ایم ایف مشن کے ساتھ اختتامی اجلاس کی صدارت کی۔ آئی ایم ایف کے متوقع پروگرام کیلئے پالیسی و ڈھانچہ جاتی اصلاحات کے فریم ورک بارے اتفاق رائے کے سلسلہ میں حکومت پاکستان اور مشن کے درمیان نمایاں پیشرفت ہوئی۔ بیان کے مطابق آئی ایم ایف کے ساتھ پروگرام کو حتمی شکل دینے کیلئے آنے والے ہفتوں میں مثبت بات چیت جاری رہے گی۔ حکومت پاکستان نے عام لوگوں کی سماجی و اقتصادی بہتری کو بڑھانے سے متعلق اپنے وسیع البنیاد ترقیاتی ایجنڈا کے حصول کے سلسلہ میں آئی ایم ایف کی جانب سے معاونت کا اعتراف کرتے ہوئے اسے سراہا۔