Live Updates

کرتار پور بارڈر کھولنا بڑا اقدام، حکومت نے 100دنوں میںانتظامی، مالیاتی سمت کو درست کر دیا، سابق وزیراعظم سردار عتیق کی ’’اے پی پی‘‘ سے گفتگو

پیر 3 دسمبر 2018 15:10

اسلام آباد ۔ (اُردو پوائنٹ اخبارتازہ ترین - اے پی پی۔ 03 دسمبر2018ء) سابق وزیراعظم آزاد کشمیر سردار عتیق احمد خان نے کہا ہے کہ حکومت نے کرتار پور بارڈر کھول کر دانشمندی کا ثبوت دیا ہے،100 دنوں میں حکومت نے انتظامی، مالیاتی سمت کو درست کردیا ہے۔ ان خیالات کا اظہار انہوں نے ’’اے پی پی‘‘ سے گفتگو کرتے ہوئے کیا۔ سردار عتیق احمد خان نے کہاکہ مسئلہ کشمیر پرکوئی بھی اقدام کرنے سے گلگت بلتستان اور آزاد کشمیر کی قیادت کو اعتماد میں لینا چاہیے۔

مسئلہ کشمیر پر وزیر خارجہ شاہ محمود قریشی نے اقوام متحدہ کی جنرل اسمبلی میں بہترین تقریر کی جس کو تمام حلقوں کی جانب سے سراہا گیا۔ انہوںنے کہاکہ ہم چاہتے ہیں کہ گلگت بلتستان کی داخلی خود مختاری میں اضافہ ہونا چاہیے۔

(جاری ہے)

انہوں نے کہاکہ کرتار پور بارڈر کھولنا حکومت کا بہت بڑا اقدام ہے ۔ انہوںنے اس بات سے اپنی دانشمندی کا ثبوت دیا ہے۔

اس پر میں وزیراعظم عمران اور آرمی چیف قمر جاوید باجوہ کو مبارکباد پیش کرتا ہوں۔ انہوںنے کہاکہ کرتار پور بارڈر کھولنے پر سابق کرکٹر نوجوت سنگھ سدھو نے بھی خوبصورت باتیں کی ہیں جو حقائق پر مبنی ہیں۔ انہوںنے کہاکہ اس فیصلے نے ثابت کردیا ہے کہ پاکستان کی حکومت اور قیادت نہ بھارت سے نفرت کرتی ہے اور نہ ہی ہندوؤں سے ، صرف اور صرف بھارت کی انتہا پسند پالیسیاں راستے میں رکاوٹ ہیں۔

انہوںنے کہاکہ کرتار پور بارڈر سے یہ ثابت ہو گیا ہے اور پوری دنیا میں یہ پیغام گیا ہے کہ ہم کھلے دل کے ہیں اور کھلے راستے بھی دینا چاہتے ہیں۔ انہوںنے کہاکہ اس اقدام سے مذہبی سیاحت کو فروغ ملے گا اور آزاد کشمیر ، گلگت بلتستان اور لداخ میں جتنے ہندو، بدھ مت اور سکھوں کے تاریخی مقامات ہیں ان پر بھی اجازت ملنی چاہیے۔ سردار عتیق نے کہاکہ میں یہ سمجھتا ہوں کہ ان 100 دنوں میں حکومت نے انتظامی، مالیاتی سمتوں کو درست کردیا ہے جس کے مثبت اثرات وقت گزرنے کے ساتھ سامنے آئیں گے۔

انہوں نے کہاکہ پاکستان تحریک انصاف کی حکومت آنے سے ملک کی اندرونی سیاست میں تبدیلی نظر آرہی ہے جو ایک اچھا شگون ہے۔ انہوں نے کہاکہ یہ بات بھی حقیقت ہے کہ عمران خان کو بے پناہ مشکلات کا سامنا ہے مگر وقت کے ساتھ تمام مسائل حل ہوجائیں گی۔