Live Updates

بلوچستان کے تعلیمی اداروں کیلئے تعطیلات کا اعلان

کرونا وائرس کیسز رپورٹ ہونے کے بعد صوبے کے تعلیمی اداروں کیلئے موسم سرما کی تعطیلات میں 2 ہفتے کا اضافہ کر دیا گیا

muhammad ali محمد علی بدھ فروری 23:13

بلوچستان کے تعلیمی اداروں کیلئے تعطیلات کا اعلان
کوئٹہ (اُردو پوائنٹ اخبارتازہ ترین۔ 26 فروری2020ء) بلوچستان کے تعلیمی اداروں کیلئے ہنگامی تعطیلات کا اعلان، کرونا وائرس کیسز رپورٹ ہونے کے بعد صوبے کے تعلیمی اداروں کیلئے موسم سرما کی تعطیلات میں 2 ہفتے کا اضافہ کر دیا گیا۔ تفصیلات کے مطابق بلوچستان کی حکومت نے کروانا وائرس کے خدشات کے باعث صوبے کے تعلیمی ادارے مزید 2 ہفتے کیلئے بند رکھنے کا فیصلہ کیا ہے۔

صوبائی حکومت نے اعلان کیا ہے کہ صوبے کے تعلیمی اداروں میں جاری موسم سرما کی تعطیلات کو 29 فروری تک ختم ہو جانا تھا، تاہم اب تعطیلات میں مزید 2 ہفتے کا اضافہ کر دیا گیا ہے۔ صوبے کے تعلیمی ادارے اب یکم مارچ کی بجائے 15 مارچ کو کھلیں گے۔ واضح رہے کہ معاون خصوصی صحت ڈاکٹر ظفر مرزا نے پاکستان میں کورونا وائرس کے 2 کیسز کی تصدیق کر دی۔

(جاری ہے)

سماجی رابطے کی ویب سائٹ ٹویٹر پر ڈاکٹر ظفر مرزا نے کورونا وائرس کے دو کیسز کی تصدیق کرتے ہوئے کہا کہ دونوں کیسز کا کلینیکل اسٹینڈرڈ پروٹوکولز کے مطابق خیال رکھا جارہا ہے اور دونوں افراد کی حالت مستحکم ہے۔

انہوں نے کہا کہ حالات کنٹرول میں ہیں اور گھبرانے کی ضرورت نہیں۔ جبکہ وزیراعلیٰ بلوچستان جام کمال خان نے کہا ہے کہ صوبائی حکومت کرونا وائرس کی روک تھام اور احتیاطی تدابیر کے حوالے سے پوری طرح مستعد ہے، تفتان اور ایران افغانستان سے ملنے والے سرحدی علاقوں کے انٹری پوائنٹس پر بلوچستان داخل ہونے والے افراد کی اسکریننگ کے علاوہ تشخیص کے لئے آئیسولیشن وارڈ قائم کرنے کے لئے ہنگامی بنیادوں پر اقدامات کئے جارہے ہیں اور حکومت تمام وسائل فراہم کررہی ہے۔ جبکہ یہ بھی واضح رہے کہ اس وقت بلوچستان کے تمام سرحدی علاقوں میں طبی ایمرجنسی بھی نافذ کی جا چکی ہے۔
کرونا وائرس کی تباہ کاریاں سے متعلق تازہ ترین معلومات