شہرقائد 5 سے 8 مئی کے دوران ہیٹ ویو کی لپیٹ میں رہ سکتا ہے، محکمہ موسمیات

کراچی(اُردو پوائنٹ اخبارتازہ ترین - این این آئی۔ 01 مئی2020ء) مئی کا شمار گرم ترین مہینوں میں کیا جاتا ہے، آئندہ ہفتے کراچی میں پھر ہیٹ ویو آنے کا امکان ہے۔کراچی کے شہریوں کو محکمہ موسمیات نے خبردار کرتے ہوئے کہا ہے کہ 5 سے 8 مئی کے دوران شہر ہیٹ ویو کی لپیٹ میں رہ سکتا ہے۔ڈائریکٹر محکمہ موسمیات سردار سرفراز کے مطابق 5 سے 8 مئی کے دوران شہر میں شدید گرمی پڑے گی اور درجہ حرارت 42 ڈگری سینٹی گریڈ تک رہنے کا امکان ہے۔

(جاری ہے)

انہوں نے بتایا کہ ہیٹ ویو کے دوران شہرِ قائد میں دن کے اوقات میں سمندری ہوائیں معطل رہیں گی۔ڈائریکٹر محکمہ موسمیات کے مطابق کراچی میں شمال مغربی علاقوں سے گرم ہوائیں چلنے کے باعث موسم گرم رہنے کا امکان ہے۔محکمہ موسمیات کے مطابق کراچی میں جمعہ کو کم سے کم درجہ حرارت27ڈگری سینٹی گریڈ جبکہ زیادہ سے زیادہ درجہ حرارت37سینٹی گریڈریکارڈ کیا گیا ۔کراچی میں ہوا میں نمی کا تناسب 63فیصد ریکارڈ کیاگیا،جمعہ کو14کلو میٹر فی گھنٹہ کی رفتار سے جنوب مغرب سے ہوائیں چلتی رہیں۔