9مئی کو ضابطہ اخلاق کے مطابق کاروبار کھولیں گے ، تاجروں کی پریس کانفرنس

جمعہ 8 مئی 2020 18:47

لاہور۔8 مئی(اُردو پوائنٹ اخبارتازہ ترین - اے پی پی۔ 08 مئی2020ء) آل پاکستان انجمن تاجران کے مرکزی سیکرٹری جنرل نعیم میرنے کہا ہے کہ 9مئی کو ضابطہ اخلاق کے مطابق کاروبار کھولنے جارہے ہیں ملک بھراور چاروں صوبوں سے مشاورت مکمل ہو چکی ہے، کسی قسم کی غلط فہمی تاجروں اور حکومت کے درمیان نہیں ہونی چاہئے۔ ان خیالات کا اظہارانہوں نے دیگرتاجر رہنماؤں کے ساتھ لاہور پریس کلب میں پریس کانفرنس سے خطاب کرتے ہوئے کیا۔

نعیم میر نے کہا کہ تاجر برادری کی جانب سے وزیر اعظم کا مشکور ہوں کہ 9 مئی سے لاک ڈاؤن ختم کرنے کااعلان کیا ہے،وزیر اعظم عمران خان نے چھوٹے تاجروں کی پریشانی کو سمجھاہے، حکومتی فیصلے سے معاشی مسائل سے باہر نکلنے میں مدد ملے گی، معیشت کا پہیہ چلے گا، اب کرونا کے ساتھ اپنی زندگیاں گزارنی ہیں اور اس کی روک تھام کرنی ہے۔

(جاری ہے)

ملک بھر کی تاجر برادری سے اپیل کرتاہوں جو مقامی حکومت ضابطہ اخلاق بنائے اس پر عمل درآمد کرے۔

اگردکانیں کھولنے سے کرونا پھیلا تو ریاست ایکشن میں آئیگی اور دکان و علاقہ سیل کر دیاجائیگا۔انہوں نے مزید کہا کہ چھوٹی دکانیں کھولنے پر کسی کو کوئی ابہام نہیں رہنا چاہیے ، وزیر اعظم چاہتے ہیں چھوٹا تاجر اپنا کام شروع کرکے مشکل حالات سے باہر نکل آئے، چھوٹا تاجر خواہ وہ شاہ عالمی میں ہو، مال روڈ پرہو وہ ہی دکان کھول سکے گا، ٹیکس والے خود فیصلہ کر لیں جس کی آمدنی زیادہ ہے اسے نہ کھولنے دیں،بڑے بڑے شاپنگ مالز بند کرنے پر ہمیں کوئی اعتراض نہیں ہے۔

صدر انجمن تاجران لاہور ملک امانت نے کہاکہ صبح پانچ سے شام پانچ بجے تک دکانیں کھولنے کا وزیر اعظم کااحسن اقدام ہے۔ تاجر رہنما سہیل بٹ نے کہاکہ وزیر اعظم تاجروں کیلئے نرم گوشہ رکھتے ہیں۔ ہم نے دیکھنا ہے کہ کس طرح رکاوٹوں کو دور کرنا ہے، میں تاجر بھائیوں کو پیغام دیتاہوں کہ وزیر اعظم کے اعلان کے مطابق تمام کاروبار کھولیں گے، اپنے لئے اور چھوٹے ملازمین کے واجبات کیلئے کمائیں گے۔ انہوں نے کہا کہ تمام تاجر ملک کیلئے ایک ایک لاکھ روپے بھی دیں کیونکہ وزیر اعظم کہتے ایک لاکھ کے ساتھ تین لاکھ قومی فنڈز میں دیں گے۔ سرپرست اعلیٰ انجمن تاجران لاہورعمران بشیر نے کہاکہ ایک ہزار سکوائر سے چھوٹی والی دکان ہی کھولنے کی اجازت دیں۔