سپیکر پنجاب اسمبلی اور 26معطل اپوزیشن اراکین کی ملاقات کی اندرونی کہانی

چاہتا ہوں معاملہ مذاکرات کے ذریعے حل ہو اور معاملہ آگے نہ بڑھے‘سپیکر ملک احمد خان

جمعہ 11 جولائی 2025 22:28

سپیکر پنجاب اسمبلی اور 26معطل اپوزیشن اراکین کی ملاقات کی اندرونی کہانی

لاہور (اُردو پوائنٹ اخبارتازہ ترین - این این آئی۔ 11 جولائی2025ء)سپیکر پنجاب اسمبلی ملک احمد خان اور 26معطل اپوزیشن اراکین کی ملاقات کی اندرونی کہانی سامنے آ گئی۔ذرائع کے مطابق سپیکر پنجاب اسمبلی ملک احمد خان نے کہا کہ مجھے اسمبلی پروسیجر رولز کے تحت چلنا ہے، کسی کو احتجاج کرنا ہے تو اس کا حق ہے لیکن نشست پر کھڑے ہو کر۔ملک احمد خان نے کہا کہ یہ حق کسی کو حاصل نہیں کہ وہ دھمکانے کے انداز میں اتنا شور کرے کہ کان پڑی آواز بھی سنائی نہ دے، کسی کو یہ حق حاصل نہیں کہ وہ میری نشست تک پہنچے اور ایوان میں جتھہ بنا کر دھمکائے۔

سپیکر پنجاب اسمبلی نے کہا کہ اگر سینئر اراکین درمیان میں نہ آتے تو شاید جسمانی تصادم ہو جاتا، ایوان میں ممبران کا احترام خصوصا خواتین کا احترام ہم سب پر فرض ہے۔

(جاری ہے)

انہوں نے کہا کہ ایسا طرز عمل ایوان کے تقدس اور ایوان کے سینئر ممبر کی تقریر کی توہین ہے، یہ طرز عمل کسی صورت برداشت نہیں ، آپ سب کو اپنی سیاسی پوزیشن رکھنے کا حق ہے، میں سب کا احترام کرتا ہوں ۔

پی ٹی آئی معطل اراکین اسمبلی نے کہا کہ احتجاج کرنا ہمارا حق ہے، ہمیں آپ احتجاج کرنے سے نہیں روک سکتے، ہم ایوان میں اسمبلی پروسیجر رولز اور سپیکر کے عہدے کا احترام کرتے ہیں۔معطل اراکین اسمبلی نے کہا کہ ہم چاہتے ہیں کہ ایوان اسمبلی پروسیجر رولز کے تحت چلے، ہم آپ کے ساتھ چلنے کو تیار ہیں، ہمیں جمہوری رویہ کو اپنانا ہوگا، جمہوریت میں ہر کسی کو احتجاج کرنے اور اپنا موقف سامنے رکھنے کا حق ہے۔

اپوزیشن لیڈر ملک احمد خان بھچر نے کہا کہ ہمیں معاملہ یہاں حل کرکے آگے نکلنا ہوگا، جس پر سپیکر پنجاب اسمبلی نے کہا کہ میں بھی چاہتا ہوں کہ معاملہ مذاکرات کے ذریعے حل ہو اور معاملہ آگے نہ بڑھے۔سپیکر پنجاب اسمبلی نے کہا کہ کمیٹی تشکیل دیتا ہوں تاکہ دونوں بیٹھ کر معاملات کو ایک پیج پر لائیں، جس نے جہاں غلطی کی وہ اس کی معذرت کرے میں اس کی معذرت قبول کر لوں گا۔