وزیراعلیٰ پنجاب شکایت سیل کانوٹس، فیصل آباد میں طالبعلم کو اغوا کے بعد قتل کرنیوالے ملزمان گرفتار

جمعہ 11 جولائی 2025 21:47

لاہور (اُردو پوائنٹ اخبارتازہ ترین - آن لائن۔ 11 جولائی2025ء) وزیراعلیٰ پنجاب شکایت سیل کے چیئرمین شعیب مرزا کے نوٹس پر فیصل آباد میں طالب علم کو اغوا کے بعد قتل کرنے والے ملزم پکڑے گئے۔ بلال نواز اور عمر اسلم نے احد کو اغوا کرکے تاوان کا مطالبہ کیا تھا۔ مقتول احد کی مزاحمت پر ملزم بلال اور عمر نے طالبعلم کو مار دیا ۔

(جاری ہے)

ملزمان قتل کرنے کے باوجود لوکیشن بدل بدل کر ورثا سے تاوان مانگتے رہے۔

مقتول احد کی ڈیڈباڈی کو عمر نے اپنے کرائے کے گھر میں رکھا اور بعد میں سڑک کنارے پھینک دیا۔ چیئرمین شکایت سیل شعیب مرزا نے نوٹس لیکر فیصل آباد پولیس کو ملزمان کی گرفتاری کی ہدایت کی۔ تھانہ منصور آباد کی خصوصی پولیس ٹیم نے جدید طریقہ تفتیش سے ملزمان کو گرفتار کر لیا۔ ملزمان بلال اور عمر نے مبینہ طور پر اپنے جرم کا اعتراف بھی کر لیا۔