خدمات کا اعتراف، قطر ایئرویز کا طبی عملے کو ایک لاکھ اعزازی ٹکٹیں دینے کا اعلان

اعزازی ٹکٹیں ڈاکٹرز، میڈیکل پریکٹیشنرز، نرسز، پیرا میڈیکس، لیب ٹیکنیشنز، کیلینکل ری سرچرز اور فارماسسٹس کے لیے جاری کی جائیں گی: قطر ایئرویز

عثمان خادم کمبوہ منگل 12 مئی 2020 22:27

خدمات کا اعتراف، قطر ایئرویز کا طبی عملے کو ایک لاکھ اعزازی ٹکٹیں دینے ..

دوحہ (اُردو پوائنٹ اخبارتازہ ترین۔ 12 مئی2020ء) طبی عملے کی خدمات کے اعتراف میں قطر ایئرویز کا طبی عملے کو ایک لاکھ اعزازی ٹکٹیں دینے کا اعلان، قطر ایئرویز کے مطابق خدمات کے اعتراف میں قطر ایئرویز کی جانب سے اعزازی ٹکٹیں ڈاکٹرز، میڈیکل پریکٹیشنرز، نرسز، پیرا میڈیکس، لیب ٹیکنیشنز، کیلینکل ری سرچرز اور فارماسسٹس کے لیے جاری کی جائیں گی۔

کمپنی کے مطابق طبی عملے سے تعلق رکھنے والے افراد کو ان کے لیے اور ان کے ہمراہ جانے والے فرد کے لیے اکانومی کلاس کے دو ٹکٹس جاری کیے جائیں گے جس پر وہ قطر ایئرویز کے ذریعے کہیں بھی چھٹیاں گزارنے جا سکتے ہیں۔ اس کے علاوہ دوحہ کے حماد انٹرنیشنل ایئرپورٹ پر ڈیوٹی فری آوٹ لیٹس سے خریداری کرنے پر انہیں 35 فیصد رعایت بھی دی جائے گی۔

(جاری ہے)

کمپنی نے کہا ہے کہ روانگی سے قبل ایئرپورٹ پر موجود چیک پوائنٹ پر اپنے اصلی دستاویز اور میڈیکل لائسنس یا رجسٹریشن کی تصدیق کروانا لازمی ہوگا۔

قطر ایئرویز کے مطابق یہ فیصلہ کرونا وائرس سے پیدا ہونے والی صورت حال کے دوران طبی عملے کے کوششوں کی تعریف اور ان کے حوصلے کی داد دینے کے لیے کیا گیا ہے۔ جبکہ معاشی ماہرین کے مطابق کسی فضائی کمپنی کی جانب سے یہ ایک احسن اقدام ہے لیکن اس کے پیچھے ایک سوچ اپنے مالی نقصانات کو پورا کرنا بھی ہے تاکہ مسافروں میں اعتماد بڑھے اور وہ دوبارہ فضائی سفر کی جانب لوٹیں۔

دوسری جانب پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ وزیر اعظم عمران خان چاہتے ہیں کہ کورونا وائرس کی وباء تھمنے کے بعد فرنٹ لائن پر لڑنے والے طبی عملے کو پوری قوم کی جانب سے اجتماعی میڈل ملنا چاہیے۔ جبکہ کرونا وائرس کیخلاف جنگ لڑنے والے طبی عملے کو خراج تحسین پیش کرنے کی قرارداد پنجاب اسمبلی میں جمع کروادی گئی ۔مسلم لیگ (ن) کی رکن سمیرا کومل کی جانب سے جمع کرائی گئی قرار داد کے متن میں کہاگیا کہ پنجاب اسمبلی کا یہ ایوان کرونا وائرس کیخلاف جنگ لڑنے طبی عملے کو خراج تحسین پیش کرتا ہے۔ ڈاکٹرز ،نرسز اور پیرا میڈیکل سٹاف قوم کی اصل ہیروز ہیں۔