آزادکشمیر میں گزشتہ چوبیس گھنٹوں کے دوران کرونا کے 8نئے کیسز سامنے آئے،سب کا تعلق مظفرآباد سے ہے،ڈاکٹر مصطفی بشیر

حکومت آزادکشمیر نے تین دن کیلئے بابرز شاپس / بیوٹی سیلونز کو کھلا رکھنے کی اجازت دیدی ہے ،باقاعد ہ ایس او پی بھی جاری کر دیا گیا ہے، باربرز شاپس اور بیوٹی سیلونز صبح آٹھ سے رات 12بجے تک کھلے رہیں گے کرونا کے کیسز میں تیزی سے اضافہ ہونا خطرناک ہے عوام کو سنجیدگی کا مظاہرہ کرنا ہوگا،آزادکشمیر میں کرونا کے کل کیسزکی تعداد166ہو گئی ہے،ترجمان حکومت آزاد کشمیر

جمعرات 21 مئی 2020 20:26

مظفرآباد(اُردو پوائنٹ اخبارتازہ ترین - این این آئی۔ 21 مئی2020ء) آزادجموں وکشمیر کے وزیر آئی ٹی و حکومتی ترجمان ڈاکٹر مصطفی بشیر نے کہا ہے کہ آزادکشمیر میں گزشتہ چوبیس گھنٹوں کے دوران کرونا وائرس کے 8نئے کیسز سامنے آئے،ان سب کا تعلق مظفرآباد سے ہے ۔ حکومت آزادکشمیر نے تین دن کیلئے بابرز شاپس / بیوٹی سیلونز کو کھلا رکھنے کی اجازت دیدی ہے اور اس کیلئے باقاعد ہ ایس او پی بھی جاری کر دیا گیا ہے ۔

باربرز شاپس اور بیوٹی سیلونز صبح آٹھ سے رات 12بجے تک کھلے رہیں گے ۔ آئسولیشن ہسپتال مظفرآبا د میں زیر علاج کرونا کے 16مریضوں کے ٹیسٹ نیگٹیو آئے ہیں انہیں آج ( جمعہ) کو ڈسچارج کر دیا جائے گا ۔کرونا کے کیسز میں تیزی سے اضافہ ہونا خطرناک ہے عوام کو سنجیدگی کا مظاہرہ کرنا ہوگا،آزادکشمیر میں کرونا کے کل کیسزکی تعداد166ہو گئی ہے۔

(جاری ہے)

مقبوضہ کشمیر میں تین درجن سے زائد معصوم شہریوں کے مکانوں کو نذر آتش کرنے کی شدید مذمت کرتا ہوں ۔ بھارتی فوج طے شدہ منصوبہ بندی کے تحت کشمیریوں کی املاک تباہ کررہی ہے ۔ ان خیالات کا اظہار انہوں نے میڈیا سے گفتگو کرتے ہوئے کیا۔ ڈاکٹر مصطفی بشیر نے کہاکہ مظفرآباد میں کرونا کے جو نئے آٹھ کیسز سامنے آئے ہیں یہ سب پہلے سے موجود کرونا کے مریضوں کے کنٹکٹ ہیں ۔

ڈاکٹر مصطفی بشیر نے کہاکہ آزادکشمیر میں اب 4659افراد کے کرونا کے شبہ میں ٹیسٹ لیے گئے جن میں سے 4343کے منفی آئے اور 166میں کرونا کی تصدیق ہوئی اور ان میں سے 79صحت یاب ہو چکے ہیں جبکہ 86مختلف آئسولیشن ہسپتالوں میں زیر علاج ہیں جن میں سے 74آئسو لیشن ہسپتال مظفرآباد،سی ایم ایچ راولاکوٹ میں 3، ڈی ایچ کیو باغ میں 03، ڈی ایچ کیو میرپور میں6مریض زیر علاج ہیں ۔

تمام اضلاع میں59قرنطینہ سینٹرز قائم کیے گئے ہیں۔ انہوں نے کہاکہ حکومت آزاد کشمیر نے بابررز اور بیوٹی سیلون کو تین دن کے لیے کھولنے کی اجازت دیدی ہے اور اس سلسلہ میں ان شاپس ہولڈرز کو ایک ایس او پی بھی دیا گیا ہے جس پر سو فیصد عملدرآمد بنانا ضروری ہوگا۔ انہوںنے کہاکہ گزشتہ پندرہ دنوں کے دوران کرونا کے کیسز بہت تیزی سے اضافہ ہوا ہے ۔

شہریوں کو سنجیدگی کا مظاہرہ کرنا ہوگا۔ حکومت نے پہلے بروقت لاک ڈائون کیا اور اس کے نتائج بھی سامنے آئے اور آزادکشمیر میں کرونا کا پھیلائو کافی حد تک کنٹرول میں رہا لیکن گزشتہ دود ہفتوں سے مسلسل کیسز کی تعداد میں اضافہ ہورہا ہے جس پر عوام سے اپیل کرتے ہیں کہ احتیاطی تدابیر کو ملحوظ خاطر رکھیں ۔بازاروں میں جاتے وقت ماسک اور سینٹی ٹائزر کا استعمال کریں ۔