آئی سی سی نے کورونا کے پیش نظر گائیڈ لائنز جاری کردیں

ٹیمیں انٹرنیشنل مقابلوں سے قبل کورونا وائرس کا ٹیسٹ کروائیں گی اور کھلاڑی کم از کم چودہ روز قرنطینہ میں گزاریں گے

ہفتہ 23 مئی 2020 13:59

آئی سی سی نے کورونا کے پیش نظر گائیڈ لائنز جاری کردیں

دبئی (اُردو پوائنٹ اخبارتازہ ترین - این این آئی۔ 23 مئی2020ء) انٹرنیشنل کرکٹ کونسل (آئی سی سی) نے کورونا وائرس وبا کے بعد کرکٹ کی بحالی کیلئے گائیڈ لائن جاری کردی ہیں جس کے بعد پلیئرز فیلڈ پر کسی بھی کامیابی کا جشن منانے کے لیے نہ ایک دوسرے سے گلے مل پائیں گے، نہ ہی ہاتھ ملا سکیں گے جبکہ ہائی فائیو پر بھی پابندی ہوگی۔کرکٹ کی عالمی تنظیم کی جانب سے سولہ صفحات پر مشتمل ’آئی سی سی بیک ٹو کرکٹ گائیڈ لائنز‘ گزشتہ روز جاری کی گئیں جس میں اس بات کی تصدیق کردی گئی ہے کہ بولرز گیند چمکانے کے لیے تھوک کا استعمال نہیں کرسکیں گے۔

آئی سی سی دستاویزات کے مطابق کھلاڑی فیلڈ پر آپس میں ایک دوسرے سے فاصلہ رکھیں گے جس کی وجہ سے کوئی ایسی سیلبریشن نہیں ہوگی جس میں باڈی کونٹیکٹ ہو، ساتھ ساتھ پلیئرز اپنا سامان علیحدہ استعمال کریں گے اور پانی کی بوتل سمیت کوئی بھی چیز شیئر نہیں کی جائے گی۔

(جاری ہے)

فیلڈ میں بولرز اپنا کوئی بھی سامان، جیسے سوئٹرز، سن گلاسز، جمپرز، کیپ وغیر امپائرز کو نہیں دیں گے، ہر کھلاڑی اپنے سامان کو رکھنے کا خود ذمہ دار ہوگا۔

بولرز کو یہ ہدایت بھی دی گئی ہیں کہ وہ گیند کے استعمال کے بعد اپنے چہرے کو چھونے سے گریز کریں گے اور بار بار ہینڈ سینٹیٹائزرز کا استعمال کریں گے، امپائرز دستانے پہن کر گیند کو چھوئیں گے۔گائیڈ لائن میں ٹریننگ کے دوران کھلاڑیوں کے درمیان کم از کم ڈیڑھ میٹر فاصلے کی بھی ہدایت کی گئی ہے۔آئی سی سی کے مطابق یہ گائیڈ لائن اس کے میڈیکل ایڈائزری بورڈ کی ہدایات کی روشنی میں مرتب کی گئی ہیں جس نے سفارش کی ہے کہ ہر ٹیم کے ساتھ ایک چیف میڈیکل آفیسر کا تقرر کیا جائے جو کھلاڑیوں کو صحتمد ماحول کی فراہمی کا ذمہ دار ہوگا۔

ایک اور پوائنٹ میں سفارش کی گئی ہے کہ ٹیمیں انٹرنیشنل مقابلوں سے قبل کورونا وائرس کا ٹیسٹ کروائیں گی اور کھلاڑی کم از کم چودہ روز قرنطینہ میں گزاریں گے۔فآئی سی سی گائیڈ لائنز میں انٹرنیشنل سیریز کیلئے ٹیموں کو چارٹرڈ فلائٹس میں سفر کرنے کا مشورہ دیا گیا ہے اور ساتھ ساتھ یہ مشورہ بھی دیا گیا ہے کہ پلیئرز کے لیے علیحدہ کمرے ہوں اور ٹیم ایک ہی فلور پر قیام کرے۔