موسلا دھار بارش کے بعد واسا نے راتوں رات نشیبی علاقوں سے پانی نکال دیا

بدھ 1 جولائی 2020 14:44

ملتان (اُردو پوائنٹ اخبارتازہ ترین - اے پی پی۔ 01 جولائی2020ء) منگل کی رات ملتان میں ہونے والی موسلا دھار بارش کے بعدبہت سے نشیبی علاقوں میں پانی جمع ہوگیا۔ ملتان کے مختلف علاقوں میں 20 ملی میٹر سے 44 ملی میٹر تک بارش ریکارڈ کی گئی۔

(جاری ہے)

بارش کے بعد واسا میں ہائی الرٹ جاری کر کے تمام سیوریج اور ڈسپوزل اسٹیشن ڈویژن کے افسروں اورسٹاف کو ہنگامی بنیادوں پر فیلڈ میں طلب کرلیا گیا اور شہر بھر کے مختلف علاقوں میں نکاسی آب کے لیے آپریشن شروع کردیا گیا ۔

شام سے قبل شروع ہونے والا بارش کا سلسلہ رات گئے تک جاری رہا ۔کورونا ایمرجنسی کے باوجود فیلڈ سٹاف بارش کے پانی کی نکاسی کے لئے مسلسل متحرک رہے۔اس دوران ایم ڈی واسا نسیم خالد چانڈیو نے بھی شہر کے مختلف علاقوں کادورہ کیا اور انہوں نے لوڈ شیڈنگ ہونے کی صورت میں پمپوں کو جنریٹرز پر چلانے کا حکم دیا ۔رات گئے تک واسا کا نکاسی آب کاآپریشن جاری رہا۔