بھنگ کو میتھی سمجھ کر کھانے سے سارا خاندان اسپتال منتقل

بھارت میں ایک خاندان نے بھنگ کے پتّوں کو میتھی سمجھ کر کھا لیا، حالت غیر ہونے پر انہیں اسپتال منتقل کر دیا گیا۔ بھارتی میڈیا

کامران حیدر اشعر اتوار 5 جولائی 2020 03:56

نئی دہلی (اُردو پوائنٹ اخبارتازہ ترین۔ 05 جولائی 2020ء) بھنگ کو میتھی سمجھ کر کھانے سے سارا خاندان اسپتال منتقل۔ بھارت میں ایک خاندان نے بھنگ کے پتّوں کو میتھی سمجھ کر کھا لیا جس کے باعث ان کی حالت غیر ہوگئی اور انہیں اسپتال منتقل کیا گیا۔ تفصیلات کے مطابق بھارت میں اپنی نوعیت کا ایک انوکھا واقعہ پیش آیا جس میں بھنگ کو میتھی سمجھ کر استعمال کر لیا گیا۔

بھارتی میڈیا کے مطابق یہ انوکھا واقعہ ریاست اتر پردیش میں پیش آیا جہاں ایک مقامی سبزی فروش نوال کشور نے نتیش نامی شخص کو بھنگ کے پتوں کو مذاق میں میتھی کہہ کر بیچ دیا۔ بعدازاں نتیش نے یہ بھنگ کے پتے اپنی بھابی کو پکانے کے لیے دے دیے اور ان کے گھر میں موجود 6 افراد نے اسے پہچانے بغیر سبزی سمجھ کر کھا لیا۔

(جاری ہے)

جیسے ہی خاندان نے کھانا کھایا تو تمام گھر والوں کی طبیعت عجیب ہونے لگی جس کے بعد انہوں نے پڑوسی سے ڈاکٹر کو بلانے کا کہا۔

جتنی دیر میں ڈاکٹر کو فون کیا گیا تو پورا خاندان بے ہوش ہوگیا۔ پڑوسی نے فوراً ہی پولیس کو بلا لیا اور ساتھ ہی متاثرہ خاندان کو بھی اسپتال منتقل کیا گیا۔ پولیس نے واقعے کی تفتیش کرنا شروع کی اور گھر میں موجود بچی ہوئی سبزی کو دیکھا تو انہیں معلوم ہوا کہ یہ تو بھنگ کے پتے ہیں۔ پولیس نے واقعہ کی مزید تفتیش کرتے ہوئے سبزی فروش کو حراست میں لے لیا اور مقدمہ بھی درج کردیا۔