اسلام آباد ہائی کورٹ :مراد سعید کے خلاف توہین عدالت کی درخواست کے قابل سماعت ہونے پر فیصلہ محفوظ

پیر 21 ستمبر 2020 21:02

اسلام آباد (اُردو پوائنٹ اخبارتازہ ترین - آن لائن۔ 21 ستمبر2020ء) اسلام آباد ہائی کورٹ جسٹس میاں گل اورنگزیب کی عدالت نے نجی ٹرانسپورٹ کمپنی کی درخواست پر وزیر مواصلات مراد سعید کے خلاف اسلام آباد ہائی کورٹ میں توہین عدالت کی درخواست کے قابل سماعت ہونے پر فیصلہ محفوظ کر لیا ہے۔ درخواست گزار کے وکیل عارف چودھری نے عدالت کو بتایا کہ عدالت نے نیشنل ہائی ویز سیفٹی آرڈیننس 2000 پر مکمل عمل درآمد کا حکم دیا تھا عدالتی فیصلے پر عمل درآمد نہیں ہو رہا۔

توہین عدالت کی کارروائی کی جائے جس پر جسٹس میاں گل اورنگزیب نے ریمارکس دیئے کہ وہ فیصلہ میرا فیصلہ تھا۔ اس لیے مناسب ہے کہ یہ درخواست کوئی اور بنچ سنے ۔اس موقع پر وکیل صفائی عارف چودھری نے عدالت کو بتایا کہ آپ کا فیصلہ ہے توہین عدالت کی درخواست بھی آپ نے ہی سننی ہے۔

(جاری ہے)

ایکسل لوڈ قانون پر عمل درآمد نہ ہونے سے قومی شاہراہوں کو نقصان پہنچ رہا ہے اس پر جسٹس میاں گل اورنگزیب نے استفسار کیا کہ کیا عدالت کا فیصلہ برقرار ہے کہیں چیلنج یا معطل تو نہیں ہوا جس پر عارف چودھری نے عدالت کو بتایا کہ عدالتی فیصلہ موجود ہے جس پر عمل درآمد نہیں کیا گیاتوہین عدالت درخواست میں سیکرٹری مواصلات، چیئرمین این ایچ اے اور آئی جی موٹر ویز بھی فریق بنایا گیا ہے ۔

عدالت نے درخواست قابل سماعت ہونے پر فیصلہ محفوظ کر لیا۔ یاد رہے کہ جسٹس میاں گل حسن اورنگزیب نے جنوری 2020 میں 14 صفحات پر مشتمل تحریری فیصلہ جاری کیا تھاعدالت نے ہائی وے سیفٹی آرڈیننس اور ایکسل لوڈ قوانین پر مکمل عملدرآمد کا حکم دیا تھا۔ راجہ بشارت۔