سندھ ہائی کورٹ،پیپلزپارٹی رہنما خورشید شاہ کے شریک ملزم پہلاج مل کی عبوری ضمانت میں توسیع

جمعرات 22 اکتوبر 2020 14:25

کراچی(اُردو پوائنٹ اخبارتازہ ترین - این این آئی۔ 22 اکتوبر2020ء) سندھ ہائی کورٹ نے پاکستان پیپلز پارٹی کے سینئر رہنما خورشید شاہ و دیگر کے خلاف آمدن سے زائد اثاثے بنانے کے ریفرنس میں ملزم پہلاج مل کی عبوری ضمانت میں توسیع کر دی۔جمعرات کوسندھ ہائی کورٹ میں شریک ملزم اور فرنٹ مین پہلاج مل کی درخواستِ ضمانت کی سماعت ہوئی۔

(جاری ہے)

قومی احتساب بیورو(نیب)کے وکیل نے عدالت میں موقف اختیار کیا کہ پہلاج مل انکوائری میں تعاون نہیں کر رہے۔

وزیرِ اعلی سندھ کے سابق معاونِ خصوصی پہلاج مل کے وکیل نے عدالت کو بتایا کہ میرے موکل کی کارڈیک سرجری ہوئی ہے، ڈاکٹر نے پہلاج مل کو 3 ہفتے تک آرام کرنے کا مشورہ دیا ہے۔عدالتِ عالیہ نے پہلاج مل کی عبوری ضمانت میں توسیع کرتے ہوئے کیس کی سماعت 19 نومبر تک ملتوی کر دی۔پیپلز پارٹی کے رہنما خورشید شاہ، پہلاج مل اور دیگر ملزمان پر آمدن سے زائد اثاثے بنانے کا الزام ہے۔