سابق وزیراعظم میاں نواز شریف کی والدہ انتقال کر گئیں

میاں نواز شریف اور شہباز شریف کی والدہ بیگم شمیم لندن میں نواز شریف کے ساتھ رہائش پذیر تھیں

شہریار عباسی اتوار 22 نومبر 2020 14:53

سابق وزیراعظم میاں نواز شریف کی والدہ انتقال کر گئیں

لاہور(اُردو پوائنٹ اخبارتازہ ترین ۔ 22 نومبر2020ء) میاں نواز شریف اور میاں شہباز شریف کی والدہ انتقال کر گئیں ۔ تفصیلات کے مطابق سابق وزیراعظم میاں نواز شریف کی والدہ بیگم شمیم اختر لندن میں انتقال کر گئی ہیں ، ان کی عمر 90 سال تھی اور وہ طویل عرصے علیل تھیں ۔ سابق وزیراعظم میاں نواز شریف کے بیٹے حسین نواز نے تصدیق کی ہے کہ ان کی دادی انتقال کر گئی ہیں، آج صبح وہ نماز کے لیے اُٹھیں تو ان کی طبیعت خراب ہوئی، جس پر انہیں ہسپتال پہنچایا گیا جہاں وہ اسی بیماری کے باعث انتقال کر گئیں ۔

ذرائع کے مطابق شہباز شریف کے بیٹے سلمان شہباز نے بھی دادی کے انتقال کی تصدیق کی ہے ۔ بتایا جا رہا ہے کہ بیگم شمیم اختر کی نماز جنازہ لندن میں ادا کی جائے گی جس کے بعد ان کی میت کو لاہور لایا جائے گا، لاہور میں دوسری مرتبہ نماز جنازہ پڑھنے کے بعد ان کو جاتی عمرہ میں ان کے شوہر میاں محمد شریف کے پہلو میں سپرد خاک کیا جائے گا ۔

(جاری ہے)

اس حوالے سے سینیئر رہنما پاکستان مسلم لیگ نواز عطاء اللہ تارڑ نے ٹوئٹر پر اپنے پیغام میں بھی تصدیق کی ہے۔

میاں نواز شریف اور میاں شہباز شریف کی والدہ محترمہ وفات پا گئیں ہیں
Api jee Passed away
إِنَّا لِلّهِ وَإِنَّـا إِلَيْهِ رَاجِعونَ
— Attaullah Tarar (@TararAttaullah) November 22, 2020

واضح رہے کہ بیگم شمیم اختر فروری میں لندن گئیں تھی، جس کے بعد سے اب تک وہ وہیں مقیم تھیں ۔ وہ لندن میں اپنے بیٹے میاں نواز شریف اور پوتے حسین نواز کے ساتھ رہائش پذیر تھیں ۔ اس وقت ان کے بڑے بیٹے نواز شریف ان کے پاس موجود تھے، جبکہ ان کے چھوٹے بیٹے میاں شہباز شریف لاہور کی جیل میں موجود ہیں ۔ ذرائع کے مطابق جیل میں حمزہ شہباز اور میاں شہباز شریف کو بیگم شمیم اختر کی وفات کی خبر دے دی گئی ہے ۔