ڈپٹی چیئرمین سینیٹ نے چیئرمین نیب کے خلاف تحریک استحقاق جمع کروادی

بدھ 25 نومبر 2020 21:57

اسلام آباد (اُردو پوائنٹ اخبارتازہ ترین - این این آئی۔ 25 نومبر2020ء) ڈپٹی چیئرمین سینیٹ سلیم مانڈوی والا نے چیئرمین نیب جسٹس (ر) جاوید اقبال کیخلاف تحریک استحقاق سینیٹ سیکرٹریٹ میں جمع کروادی۔ڈپٹی چیئرمین سینیٹ نے نیب کی جانب سے شیئرز منجمند کرنے کیخلاف تحریک استحقاق جمع کرائی ہے،تحریک استحقاق میں چیئرمین نیب، ڈی جی نیب اور تحقیقاتی افسر کو پارلیمنٹ میں طلب کرنے کا مطالبہ کیا گیا ہے۔

(جاری ہے)

سلیم مانڈی والا کے مطابق نیب قانون کے مطابق تحقیقات کرنے کے لیے آزاد ہے، مگر نیب کے پاس میرا نام بدنام کرنے اور مجھے ملزم لکھنے کا کوئی لائسنس نہیں ہے، بغیر ٹھوس ثبوت مجھے کیس میں ملزم لکھ کر میرے خلاف میڈیا پر ایک مہم شروع کی گئی۔ڈپٹی چیئرمین سینیٹ نے کہا کہ نیب کا اقدام مجھے ہراساں کرنا اور بطور ڈپٹی چیئرمین سینیٹ مجھے ڈرانے کے مترادف ہے۔سلیم مانڈوی والا نے کہا کہ نیب ریاستی اداروں کوسیاسی مقاصد کے لیے استعمال کرکے اداروں کی ساکھ تباہ کررہا ہے۔انہوں نے کہا کہ میرے خلاف نیب کے اقدام کا معاملہ سینیٹ کی استحقاق کمیٹی کے سپرد کیا جائے۔