پاکستان کے سب سے بڑے فراڈ کا نام پی ٹی آئی فارن فنڈنگ کیس ہے، چور کی گردان کرنے والا خود سب سے بڑا چور نکلا،مریم نواز

اسلام آباد (اُردو پوائنٹ اخبارتازہ ترین - این این آئی۔ 19 جنوری2021ء) پاکستان مسلم لیگ (ن) کی نائب صدر مریم نواز نے کہا ہے کہ پاکستان کے سب سے بڑے فراڈ کا نام پی ٹی آئی فارن فنڈنگ کیس ہے، چور کی گردان کرنے والا خود سب سے بڑا چور نکلا،افسوس جس ملک میں ہم رہ رہے ہیں وہاں آئین ہے نہ انصاف ،یہاں الیکشن کمیشن کو اس کی آئینی ذمہ داریاں یاد دلانے آئے ہیں،فارن فنڈنگ کیس میں 80 سماعتوں کے دوران عمران خان نے 24 مرتبہ کارروائی رکوانے کی کوشش کی ،4 مرتبہ کارروائی کو خفیہ رکھنے کی درخواستیں دیں،اگر دامن صاف تھا تو کارروائی کو خفیہ رکھنے کیلئے درخواستیں کیوں دیں ،سٹیٹ بینک نے چھپانے کے باوجود عمران خان کے 23 خفیہ اکاؤنٹس پکڑلئے ہیں،حکمران دیکھ لیں کہ جب عوام لانگ مارچ کرکے یہاں پہنچیں گے تو کیاحال ہوگا،وزیراعظم خود بے وقوف ہیں یا پھر عوام کو بے وقوف سمجھتے ہیں، ان کی حکومت میں آنے کی تیاری نہیں تھی لیکن ملک وقوم کو لوٹنے کی تیاری مکمل تھی ،پاکستان بدل رہا ہے، آواز آرہی ہے، آپ جتنا مرضی زور لگالیں عوام سے جیت نہیں سکتے۔

(جاری ہے)

منگل کو الیکشن کمیشن آف پاکستان کے سامنے پاکستان ڈیموکریٹک موومنٹ (پی ڈی ایم) کے جلسے سے خطاب کرتے ہوئے پاکستان مسلم لیگ (ن) کی نائب صدر مریم نواز نے کہا کہ یہ اگر احتجاجی ریلی اور احتجاج ہے تو دیکھ لو جس دن عوام لانگ مارچ کیلئے پہنچیں گے تو کیا عالم ہوگا۔انہوں نے کہا کہ ہم آج ایک ایسی سڑک پر موجود ہیں جس کو شاہراہ دستور کہتے ہیں جس کے دونوں اطراف انصاف دینے والے ادارے موجود ہیں لیکن بہت افسوس ہے کہ جس ملک میں ہم رہ رہے ہیں وہاں نہ کوئی آئین ہے اور نہ انصاف ہے، آج الیکشن کمیشن کے باہر اس لئے ہم جمع ہوئے ہیں کہ الیکشن کمیشن آف پاکستان کو اس کی آئینی ذمہ داریاں یاد دلائیں۔

انہوں نے کہا کہ ہم یہاں اس لئے جمع ہوئے ہیں کہ محترم چیف الیکشن کمشنر کوبتائیں کہ آپ کا ادارہ پاکستان کا آئینی اور قوم کا ادارہ ہے جس کو آئین میں عوام کی رائے کا امین بنایا ہے۔ انہوں نے کہا کہ آئین کی کتاب نے آپ کو ووٹ کی عزت کی ذمہ داری عطاء کی ہے، یہ وہ ادارہ جس کو عوام کے ووٹ کی عزت کروانی تھی۔ انہوں نے کہا کہ پاکستان کی تاریخ کے سب سے بڑے فراڈ کا نام تحریک انصاف فارن فنڈنگ کیس ہے، نومبر 2014 میں یہ کیس داخل ہوا تھا۔

انہوں نے کہا کہ نواز شریف کا کیس دنوں میں چلتا ہے اور دنوں میں ختم ہوتا ہے اور دن میں دو دو سماعتیں بھی ہوتی ہیں لیکن اس ادارے نے 7 برسوں میں 70 سماعتیں کی ہیں۔ انہوں نے کہا کہ پاکستان پر مسلط عمران خان نے مقدمے کو ملتوی کرانے کی 30 بار کوشش کی، کون کہتا تھا کہ اگر چوری نہیں کی تو تلاشی دے دو، آج پی ڈی ایم اور عوام پوچھتے ہیں کہ اگر چوری نہیں کی تو 30 بار مقدمے کو رکوانے کی کوشش کیوں کی گئی۔

انہوں نے کہا کہ تابعداد خان نے ہائی کورٹ میں 6 مرتبہ درخواستیں کہ الیکشن کمیشن آف پاکستان اس مقدمے کی سماعت نہیں کرسکتا اور ای سی پی کی سکروٹنی کمیٹی بنائی، جس کا کام تحقیقات کرکے تفصیلات عوام کے سامنے رکھنا تھا جب تحقیقات ہوئی تو جرائم کی لمبی داستان سامنے آئی کیونکہ اوپر سے حکم تھا اور سکروٹنی کمیٹی کو کہا گیا کہ ان پر ہاتھ ہولا رکھو پھر سکروٹنی کمیٹی عمران خان اور الیکشن کمیشن کی تابعدار بن گئی۔

انہوں نے کہا کہ سکروٹنی کمیٹی 3 سال سے تحقیقات کر رہی ہے حالانکہ اتنے واضح اور ہوش اڑا دینے والے حقائق ہیں، جن کا فیصلہ تین سال تو کیا تین دن میں ہوسکتا ہے لیکن تین سال سے یہ سانپ بن کر اس کے اوپر بیٹھے ہوئے ہیں۔ انہوں نے کہا کہ 80 سماعتوں کے دوران عمران خان نے کم ازکم 24 مرتبہ کارروائی رکوانے کی کوشش کی اور 4 مرتبہ درخواستیں دی کہ کارروائی کو خفیہ رکھا جائے، اگر اتنا دامن صاف تھا تو کارروائی کو خفیہ رکھنے کیلئے درخواستیں کیوں دی، اس کا مطلب ہے کہ چوری تو ہوئی ہے اور چوری بھی بہت بڑی ہوئی ہے۔

انہوں نے وزیراعظم پر تنقید کرتے ہوئے کہا کہ بیان بدلنا ان کا روز کا کام ہے اس لئے انہیں یوٹرن خان کہتے ہیں، انہوں نے صرف بیان نہیں بدلا بلکہ یہاں 8 وکیل بدلے لیکن 8 وکیلوں کو بدلنے کے باوجود چوری نہیں چھپی۔ انہوں نے کہا کہ سٹیٹ بینک نے عمران خان کے 23 خفیہ اکاؤنٹس پکڑے، جو انہوں نے ای سی پی اور پاکستان کے عوام سے چھپا رکھے تھے لیکن اسٹیٹ بینک نے پکڑ لئے۔

انہوں نے کہا کہ یہ اکاؤنٹ عمران خان کے دستخط سے آپریٹ ہورہے تھے ،یہ نہیں کہ ان کو پتہ نہیں تھا بلکہ جان بوجھ کر عوام اور ای سی پی سے اپنا جرم چھپایا اور سکروٹنی کمیٹی خود اعتراف کرتی ہے کہ ہم حقائق فراہم نہیں کرسکتے کیونکہ عمران خان نے منع کیا ہے، اب پتہ چلا کہ چور کی گردان کرنے والا خود سب سے بڑا چور نکلا۔پی ٹی آئی فارن فنڈنگ پر بات کرتے ہوئے انہوں نے کہا کہ عمران خان کے اکاؤئنٹس میں پی ٹی آئی کے اکاؤئنٹس سے پیسہ ہنڈی کے ذریعے آیا، اب پتہ چلا کہ یہ کنٹینر یں چڑھ کر عوام کو ترغیب دیتا تھا کہ ہنڈی کے ذریعے پیسہ منگواؤ کیونکہ یہ خود ہنڈی کے ذریعے پیسہ منگواتا تھا، ان کو دو ممالک بھارت اور اسرائیل فنڈنگ کرتے تھے۔

ان کے اکائونٹس میں بھارت کی بھارتیہ جنتا پارٹی کے رہنماء اندرجیت دوسان اور اسرائیلی بے ایسیشپ کے ذریعے پیسہ ٹرانسفر ہوا ۔ انہوں نے کہا کہ مودی کی جیت اور کشمیر کو بھارت کی جھولی میں ڈال دیا گیا ہے۔ انہوں نے کہا کہ یہ کہتے ہیں پی ڈی ایم سے کوئی فرق نہیں پڑا ، اگر ایسا ہوتا تو پھر سات سال بعد یہ کیس نہ کھولنا پڑتا۔ انہوں نے وزیراعظم پر شدید تنقید کرتے ہوئے کہا کہ یہ کہتا ہے کہ مجھے کچھ نہیں پتہ سب کچھ ایجنٹس نے کیا ہے،یا تو یہ خود بہت بڑا بے وقوف ہے یا پھر وہ عوام کو بے وقوف سمجھتا ہے ۔

انہوں نے کہا کہ ایک منتخب وزیراعظم کو غیر قانونی پیسہ بہاتے وقت یہ یاد نہیں آیا کہ یہ غیر قانونی پیسہ تھا یا آپ کو علم نہیں تھا ۔ انہوں نے کہا کہ ان کو دستخط کرنے کا علم تھا، پیسہ وصول کرنے کا پتہ تھا، پیسہ بہانے کا پتہ تھا، مگر یہ پتہ نہیں تھا کہ کروڑوں، اربوں آئے کہاں سے ۔ انہوں نے کہا کہ آپ کی حکومت میں آنے کی تیاری نہیں تھی مگر ملک و قوم لوٹنے کی مکمل تیاری تھی ، آٹا، گندم، چینی اور ادویات پر ڈاکہ ڈالنے کی پوری تیاری تھی ۔

انہوں نے کہا کہ اگر ایجنٹس نے سب کچھ کیا تو بتائو2018 کے انتخابات میں تمہارے ڈبوں میں ووٹ کس ایجنٹ نے ڈالے ۔ انہوں نے کہا کہ یہ بھی بتادو تمہیں ثاقب نثار سے جعلی ثاقب و امین کے سرٹیفکیٹس کس نے دیئے تھے ،یہ بھی بتادو کہ تم پاکستان کی 22کروڑ عوام کو تباہ کرنے کے ذمہ دار ہو،یہ بھی بتادو کہ عوام پر مسلط کرنے والے ایجنٹس کون ہیں ۔ انہوں نے کہا کہ پاکستان اب بدل رہا ہے، آواز آرہی ہے، آپ جتنا مرضی زور لگالیں آپ عوام سے جیت نہیں سکتے ۔

انہوں نے کہا کہ 2018 کے الیکشن میں جب آر ٹی ایس کو بند کیا گیا تو آپ کیوں خاموش رہے ۔ انہوں نے کہا کہ جب سب سے بڑے نالائق و نااہل شخص کو سلیکٹڈ کرکے 22کروڑ عوام پر مسلط کیا گیا تو آپ کیوں نہیں بولے ۔ انہوں نے کہا کہ آج اس نااہلی کی سزا 22کروڑ عوام بھگت رہی ہے، اس میں الیکشن کمیشن بھی شریک ہے۔ انہوں نے کہا کہ براڈ شیٹ کو عوام فراڈ شیٹ کہتی ہے ،تم نے پاکستان کے خون پسینے کے ٹیکس کی کمائی برطانوی ہائی کمیشن کو بھیج دی ۔

انہوں نے کہا کہ عوام کی اس رقم کو برطانیہ کی جعلی کمپنی لے اڑی،یہ جعلی وزیراعظم ہزارہ برادری کے ساتھ توہین آمیز سلوک کرتا ہے ،پہلے کہتا ہے میں بلیک میل نہیں ہونگا پھر جب جاتا بھی ہے تو غمزدہ متاثرین کو کہتا ہے ایک یونیورسٹی میں چل کرآئیں ، تعزیت کرنی ہے۔ انہوں نے کہا کہ یاد رکھنا اداروں پر وہ شخص حملہ کرتا ہے جو ناانصافی پر مبنی فیصلے لیتا ہے ،کام ایجنٹس کرواتے ہیں مگر جواب پھر اداروں کو دینا پڑتا ہے۔