نواز شریف نے کارکنوں کو نئے انتخابات کی تیاری کی ہدایت کر دی

ضمنی انتخابات میں تحریک انصاف ایک بھی نشست جیتنے میں ناکام رہی، شاید اگلے چند ماہ میں انتخابات ہو جائیں: قائد ن لیگ کا ٹوئٹر پر پیغام

محمد علی بدھ 24 فروری 2021 01:58

لندن (اُردو پوائنٹ تازہ ترین اخبار۔ 23 فروری 2021ء) نواز شریف نے کارکنوں کو نئے انتخابات کی تیاری کی ہدایت کر دی۔ تفصیلات کے مطابق پاکستان مسلم لیگ ن کے قائد اور سابق وزیراعظم نواز شریف کی جانب سے لندن سے اپنے کارکنوں کے نام اہم پیغام جاری کیا گیا ہے۔

ایسے حالات میں کچھ نہیں کہا جاسکتا شاید اگلے چند ماہ میں الیکشن ہوجائیں ورکر الیکشن کے لیے تیار ہیں ملک میں 7ضمنی انتخابات ہوئےہیں پی ٹی آئی ایک سیٹ بھی نہیں لے جاسکی.@NawazSharifMNS pic.twitter.com/rpLCv4Htfw
— PMLN (@pmln_org) February 23, 2021

نواز شریف نے اپنی جماعت کے کارکنوں کو نئے الیکشن کی تیاریوں کی ہدایت کرتے ہوئے کہا ہے کہ حالیہ ضمنی انتخابات میں تحریک انصاف ایک بھی نشست جیتنے میں ناکام رہی، کچھ کہا نہیں جا سکتا، شاید اگلے چند ماہ میں انتخابات ہو جائیں۔

یہ بات انہوں نے میڈیا نمائندوں کی جانب سے کیے گئے اس سوال کے جواب میں کہی، جس میں ان سے پوچھا گیا کہ وہ 2021 یا 2020 کس سال کو انتخابات کا سال دیکھتے ہیں۔ نواز شریف نے مزید کہا کہ ڈسکہ میں ورکرز نے ووٹ چوری پکڑی اور ورکرز ہی 2018 کی چوری بھی پکڑ لیں گے۔

(جاری ہے)

این اے 75 ڈسکہ ضمنی الیکشن کے حوالے سے نواز شریف کا کہنا ہے کہ ڈسکہ کے واقعے نے 2018 کے الیکشن میں ووٹ چوری کے تمام منصوبوں کو بے نقاب کر دیا۔

2018 میں بھی دو دن تک نتائج نہیں آئے تھے، نتائج میں تاخیر ہو جائیں تو جان لو کہ گڑبڑ ہورہی ہے اور نتائج تبدیل کیے جارہے ہیں۔ نواز شریف نے الیکشن کمیشن سے مطالبہ کیا ہے کہ این اے 75 ڈسکہ ضمنی الیکشن میں ووٹ چوری میں ملوث افراد کو قرار واقعی سزا دے تاکہ آئندہ کوئی عوام کے ووٹ پر ڈاکہ ڈالنے کی جرات نہ کرسکیں۔ یہاں واضح رہے کہ الیکشن کمیشن کی جانب سے این اے 75 ڈسکہ ضمنی الیکشن کے نتائج جاری کرنے یا نہ کرنے کے حوالے سے حتمی فیصلہ 25 فروری کو کیے جانے کا امکان ہے۔ الیکشن کمیشن کو ڈسکہ ضمنی الیکشن کے حوالے سے موصول ہونے والی رپورٹ میں 14 پولنگ اسٹیشنز کے نتائج مشکوک قرار دے کر ان پولنگ اسٹیشنز پر دوبارہ الیکشن کروانے کی سفارش کی گئی ہے۔