پی ٹی آئی رکن اسمبلی کی جانب سے شہباز شریف پر نازیبا جملے کسنے کی ویڈيو سامنے آگئی

قومی اسمبلی ميں تحریک انصاف کے رکن اسمبلی مجید نیازی اور علی امین گنڈا پور آج بجٹ پر بحث کے اجلاس میں قائد حزب اختلاف شہباز شریف پر طنز اور جملے کستے ہوئے نظر آئے

Danish Ahmad Ansari دانش احمد انصاری پیر 14 جون 2021 22:18

پی ٹی آئی رکن اسمبلی کی جانب سے شہباز شریف پر نازیبا جملے کسنے کی ویڈيو ..
اسلام آباد (اردوپوائنٹ اخبارتازہ ترین۔ 14 جون2021ء) قومی اسمبلی میں بجٹ پر بحث کیلئے اجلاس، پی ٹی آئی رکن اسمبلی کی جانب سے شہباز شریف پر جملے کسنے کی ایک اور ویڈيو سامنے آگئی- تفصیلات کے مطابق قومی اسمبلی میں بجٹ پر بحث کیلئے اجلاس ہوا، جس میں قائد حزب اختلاف شہباز شریف کی تقریر کے دوران تحریک انصاف کے رکن اسمبلی کی جانب سے جملے کسنے کی ویڈیو منظر عام پر آ گئی ہے، جس میں دیکھا جا سکتا ہے کہ حکمراں جماعت کے اراکین شہباز شریف کی تقریر کےدوران مسلسل جملے کس رہے ہیں- حکمران جماعت پاکستان تحریک انصاف (پی ٹی آئی) کے رکن قومی اسمبلی مجید نیازی کی اپوزيشن رہنماؤں پر جملے کسنے کی ایک اور ویڈيو سامنے آگئی۔

قومی اسمبلی ميں تحریک انصاف کے رکن اسمبلی مجید نیازی آج بجٹ پر بحث کے اجلاس میں قائد حزب اختلاف شہباز شریف پر طنز اور جملے کستے ہوئے نظر آئے۔

(جاری ہے)

ویڈیو میں دیکھا جاسکتا ہے کہ وفاقی وزير علی امین گنڈا پور اس انداز سے لطف اندوز ہورہے ہيں۔ اس سے قبل 11 جون کو بجٹ اجلاس میں بھی مجید نیازی نے پی پی چیئرمین بلاول بھٹو زرداری پر نازیبا جملے کسے تھے۔

واقعے کی ویڈیو سوشل میڈیا پر وائرل ہوئی تھی جس پر سوشل میڈیا صارفین نے حکومتی رکن قومی اسمبلی کو تنقید کا نشانہ بنایا تھا۔ اسی طرح پی ٹی آئی کی رکن قومی اسمبلی عاصمہ حدید کی قومی اسمبلی میں اپوزیشن کی خاتون رہنما کو منہ چھڑانے کی ویڈیو سوشل میڈیا پر وائرل ہو گئی۔ گذشتہ سے پیوستہ روز قومی اسمبلی میں نئے مالیاتی سال کا بجٹ پیش کیا گیا تھا۔

اس دوران جہاں اپوزیشن کی جانب سے شدید احتجاج کیا گیا تھا وہیں حکومتی اراکین اسمبلی کی جانب سے بھی اپوزیشن رہنماؤں کو جواب دیا گیا۔ اس حوالے سے سوشل میڈیا پر پی ٹی آئی رہنماؤں کی ویڈیوز بھی وائرل ہو رہی ہیں جس میں انہیں اپوزیشن کے خلاف نازیبا الفاظ استعمال کرتے ہوئے بھی دیکھا گیا۔ایک ویڈیو میں پاکستان تحریک انصاف کی رہنما عاصمہ حدید کو منہ چھڑاتے ہوئے بھی دیکھا جا سکتا ہے۔

سوشل میڈیا پر وائرل خبروں کے مطابق عاصمہ حدید کی ویڈیو اس وقت بنائی گئی جب وہ ن لیگ کی ترجمان مریم اورنگزیب کو دیکھ کر منہ چھڑا رہی تھیں۔ اس ویڈیو کے سامنے آنے کے بعد عاصمہ حدید پر شدید تنقید کی گئی ہے۔ ۔اس کے علاوہ ایک اور ویڈیو میں پی ٹی آئی کے رہنما کو پاکستان پیپلز پارٹی کے چئیرمین بلاول بھٹو کے خلاف نازیبا الفاط استعمال کرتے ہوئے دیکھا گیا۔

پی ٹی آئی کے رکن اسمبلی ’ بلو رانی ‘ کہتے رہے،جبکہ سینئر حکومتی اراکین اسمبلی انہیں منع کرنے کی بجائے نعروں سے لطف اندوز ہوتے رہے۔ .سوشل میڈیا پر ان ویڈیوز کے سامنے آنے کے بعد حکومت پر سخت تنقید کی جا رہی ہے جب کہ صارفین نے وزیراعظم عمران خان سے ایکشن لینے کا مطالبہ کرتے ہوئے کہا کہ مذکورہ رہنماؤں کے خلاف کارروائی کرنی چاہئیے۔بعض صارفین نے کہا کہ اپنی ناکامی ایسی حرکات کر کے چھپائی نہیں جا سکتی۔