بات چیت کے ساتھ ساتھ لاپتہ افراد، ٹارگٹ کلنگ جیسے معاملات بھی درست کرنا ضروری ہے،صلاح الدین مینگل ایڈووکیٹ

کوئٹہ (اُردو پوائنٹ اخبارتازہ ترین - آن لائن۔ 09 جولائی2021ء) سابق ایڈوکیٹ جنرل،پاکستان پریس کونسل کے سابق چیئرمین صلاح الدین مینگل ایڈووکیٹ (تمغہ امتیاز)نے کہا ہے کہ ناراض بلوچوں کے ساتھ بات چیت اور مزاکرات کے لیے وزیر اعظم عمران خان اور آرمی چیف جنرل قمر جاوید باجوہ کے بیانات خوش آئند ہیں مذاکرات اور بات چیت کے ساتھ ساتھ لاپتہ افراد، ٹارگٹ کلنگ جیسے معاملات بھی درست کرنا ضروری ہے،بلوچستان کے جعلی ڈومیسائل کے ذریعے ملازمتیں حاصل کرنے جیسے معاملات کا بھی جائزہ لیا جائے تاکہ بلوچستان کے لیے سرکاری ملازمتوں کے لیے مختص چھ فیصد کوٹہ کا درست استعمال ہوسکے،ڈنڈا کی بجائے پیار سے بات کی جائے، اور بلوچستان میں جو کونسلر منتخب نہیں ہوتے انہیں سرپرستی نہ دی جائے بلکہ حقیقی سیاسی اور اہل لوگوں کو جمہوری اداروں میں عوام کے مینڈیٹ کے ساتھ آنے دیا جائے بلوچستان کے جعلی ڈومیسائل کے ذریعے ملازمتیں حاصل کرنے جیسے معاملات کا بھی جائزہ لیا جائے تاکہ بلبوچستان کے لیے سرکاری ملازمتوں کے لیے مختص چھ فی صد کوٹہ کا درست استعمال ہوسکے، انہوں نے یہ بات یہاں صحافیوں سے گفتگو کرتے ہوئے کہی صلاح الدین مینگل ایڈووکیٹ نے کہا کہ بلوچستان ایک عرصے سے نظر انداز رہا ہے یہاں آمدو رفت کے ذرائع بہتر کیے جائیں اور کراچی کوئٹہ ہائی وے بہتر بنائی جائے، اسے دو رویہ کیا جائے، جس قدر وسائل لاہور میں اورنج ٹرین جیسے منصوبے میں تو لگائے جاتے ہیں یہ کام بلوچستان میں کیا جائے تاکہ یہاں انفراسٹریکچر بہتر ہوسکے اور گوادر کی ترقی کے لیے ضروری ہے کہ اسے ریل اور سڑک کے ذریعے ملک کے ساتھ لنک کیا جائے اس کی مدد سے اس بندرگاہ سے پورا فائدہ اٹھایا جاسکتا ہے اسی طرح کوسٹل بہتر بنائی جائے ان شاہراہوں پر ہر سال حادثات ہوتے ہیں اور آئے روز کے حادثات سے اب تک ہزاروں افراد جانوں سے ہاتھ دھو بیٹھے ہیں یہ بہت اہم معاملہ ہے اسے کسی قیمت پر نظر انداز نہیں کیا جاسکتا۔