اسلام آباد میں سیلابی صورتحال ،جب زیادہ بارش ہوتی ہے تو زیادہ پانی آتا ہے، سعید غنی کا وزیر اعظم پر طنز

بدھ 28 جولائی 2021 17:00

کراچی (اُردو پوائنٹ اخبارتازہ ترین - این این آئی۔ 28 جولائی2021ء) وزیر تعلیم سندھ سعید غنی نے وفاقی دارالحکومت اسلام آباد میں ہونے والی تیز بارش کے بعد سیلابی صورتحال پر وزیراعظم پر طنزیہ وار کرتے ہوئے کہاہے کہ ’’جب زیادہ بارش ہوتی ہے تو زیادہ پانی آتا ہے‘‘۔سعید غنی نے سوشل میڈیا سائٹ ٹوئٹر پر جاری بیان میں وزیراعظم عمران خان کو ٹیگ کرتے ہوئے کہا کہ اسلام آباد میں ہونے والی بارش نے یقینا وزیراعظم عمران نیازی کو سمجھا دیا ہوگا کہ جب زیادہ بارش ہوتی ہے تو زیادہ پانی آتا ہے۔

یاد رہے کہ سال 2019 میں بارشوں کے دوران حیدر آباد میں بلاول بھٹو زرداری نے بارش کے پانی پر بیان دیا تھا کہ ہمیں یہ چیز سمجھنا ہوگی کہ جب بارش آتی ہے تو پانی آتا ہے، جب زیادہ بارش آتی ہو تو زیادہ پانی آتا ہے۔

(جاری ہے)

بلاول بھٹو کا یہ بیان سوشل میڈیا پر وائرل ہو گیا تھا اور اس کے بعد سے ہی یہ جملہ زبان زد عام و خاص ہے۔اپنے پیغام میں سعید غنی نے کہا کہ اللہ بارش کو ہمارے لیے رحمت بنائے اور ہمارے ملک کو اسکے نقصانات سے محفوظ رکھے۔

آمینواضح رہے کہ اسلام آباد اور راولپنڈی میں موسلادھار بارش کے باعث جڑواں شہروں کے کئی علاقوں میں سیلابی صورت حال پیدا ہوگئی ہے، مکانات میں پانی داخل ہوگیا، سیکٹر ای الیون اور ڈی 12 میں سیلابی ریلے میں متعدد گاڑیاں بہہ گئیں۔ مسلسل بارش اور بادل کے پھٹنے کے باعث سیلابی صورتحال پیدا ہونے سے کے نتیجے میں ایک بچہ اور ماں جاں بحق ہوگئی۔