Live Updates

ورلڈ کپ میں بھارت کے ساتھ کیوں رکھا جاتا ہے؟، پاکستان نے آئی سی سی سے وضاحت مانگ لی

اگر پیسے کمانے کیلئے یہ فارمولہ اپنایا جاتا ہے تو پاکستان کو بھی اس آمدنی کا اضافی شیئر دیا جائے: پی سی بی کا آئی سی سی کو خط

ذیشان مہتاب پیر 2 اگست 2021 17:34

ورلڈ کپ میں بھارت کے ساتھ کیوں رکھا جاتا ہے؟، پاکستان نے آئی سی سی ..

لاہور (اردو پوائنٹ تازہ ترین اخبار ۔ 2 اگست 2021ء ) پاکستان کرکٹ بورڈ نے انٹرنیشنل کرکٹ کونسل سے وضاحت مانگی ہے کہ کس فارمولے کے تحت ہر آئی سی سی ٹورنامنٹ میں روایتی حریفوں پاکستان اور بھارت کو ایک گروپ میں رکھا جاتا ہے ، ٹورنامنٹ کی گروپنگ اگر اس بنیاد پر ہوتی ہے کہ آئی سی سی پیسے کمائےتو پاک بھارت میچ سے ہونے والی اضافی آمدنی کا میں سے پاکستان کو حصہ کیوں نہیں دیا جاتا ہے؟۔

پی سی بی ذرائع کے مطابق چیئرمین احسان مانی نے آئی سی سی کو لکھے گئے خط میں سوالات اٹھانے کے ساتھ ساتھ اپنا اضافی حصہ مانگا ہے۔ واضح رہے کہ آئی سی سی کے ہر ٹورنامنٹ جس میں ورلڈ کپ، ٹی ٹونٹی ورلڈ کپ، چیمپئنز ٹرافی، انڈر 19 ورلڈ کپ اور خواتین ورلڈ کپ شامل ہیں، پاکستان اور بھارت کو ایک گروپ میں رکھا جاتا ہے۔

(جاری ہے)

اکتوبر،نومبر میں متحدہ عرب امارات میں ہونیوالے ٹی ٹونٹی ورلڈ کپ میں بھی دونوں ٹیموں کو افغانستان ،نیوزی لینڈ اور 2 کوالیفائر ٹیموں کے ساتھ گروپ ٹومیں رکھا گیا ہے۔

روایتی حریفوں کا گروپ میچ رکھنے کی ایک وجہ یہ ہے کہ دونوں ٹیمیں فائنل میں بھی ایک دوسرے کے مدمقابل آسکیں جس سے آئی سی سی کی آمدنی دوگنی ہوجائے گی۔ پاک بھارت میچ کے نشریاتی حقوق سے آئی سی سی کو ریکارڈ آمدنی ہوتی ہے جو کسی دوسرے کھیل میں 2 ٹیموں کے درمیان ہونیوالی ایک میچ کی آمدنی میں سب سے زیادہ ہے۔ ذرائع کے مطابق آئی سی سی اپنی آمدنی سے بھارت کو 8 سال کا شیئر تقریبا 495 ملین ڈالرز دیتا ہے جبکہ اس کے مقابلے میں پاکستان کو اتنے ہی عرصے کا حصہ 145ملین ڈالرز ملتا ہے۔

بھارت کو زیادہ شیئر ملنے کی وجہ یہ ہے کہ زیادہ تر سپانسرز بھارتی کمپنیاں ہیں۔ ذرائع کے مطابق احسان مانی کا کہنا تھا کہ آئی سی سی کس بنیاد پر دنیا کے ہر ٹورنامنٹ میں روایتی حریفوں کو ایک گروپ میں رکھتا ہے، اگر پیسے کمانے کیلئے یہ فارمولہ اپنایا جاتا ہے تو پاکستان کو بھی اس آمدنی کا اضافی شیئر دیا جائے کیوںکہ اگر بھارت کی دو ٹیمیں آپس میں کھیلیں گی تب بھی اتنی آمدنی نہیں ہوسکتی۔