چینی مزید مہنگی ہو گئی، ریٹیل اور ایکس ملز قیمت میں اضافہ کر دیا گیا

وزارت نیشنل فوڈ سکیورٹی نے چینی کی نئی سرکاری قیمتوں کا نوٹیفیکیشن جاری کر دیا، نئی قیمتیں 15 نومبر 2021 تک نافذ العمل رہیں گی

محمد علی ہفتہ 25 ستمبر 2021 00:21

لاہور(اُردو پوائنٹ اخبارتازہ ترین۔ 24 ستمبر2021ء) چینی مزید مہنگی ہو گئی، ریٹیل اور ایکس ملز قیمت میں اضافہ کر دیا گیا، وزارت نیشنل فوڈ سکیورٹی نے چینی کی نئی سرکاری قیمتوں کا نوٹیفیکیشن جاری کر دیا، نئی قیمتیں 15 نومبر 2021 تک نافذ العمل رہیں گی۔ تفصیلات کے مطابق وفاقی حکومت نے چینی کی سرکاری ریٹیل اور ایکس ملز قیمت میں 25 پیسے فی کلو کا اضافہ کردیا، ریٹیل قیمت 89.50 سے بڑھا کر 89.75 روپے فی کلو کردی گئی۔

اس حوالے سے وزارت نیشنل فوڈ سکیورٹی کی جانب سے جاری کردہ نوٹیفیکیشن کے مطابق چینی کا ایکس ملز ریٹ 84.50 روپے سے بڑھاکر 84.75 روپے فی کلو مقرر کر دیا گیا ہے۔ سیلز ٹیکس سمیت چینی کا نیا ایکس ملز ریٹ 84.75 روپے فی کلو مقرر کیا گیا ہے۔ جبکہ جاری کردہ نوٹیفیکیشن کے مطابق چینی کی زیادہ سے زیادہ ریٹیل قیمت 89 روپے 75 پیسے فی کلو کر دی گئی ہے۔

(جاری ہے)

نوٹیفیکیشن کے مطابق چینی کی نئی سرکاری قیمتوں کا اطلاق فوری طور پر ہو گا اور نئی قیمتیں 15 نومبر 2021 تک نافذ العمل رہیں گی۔

تمام صوبائی چیف سیکرٹریزاور کمشنر اسلام آباد کو نوٹیفیکیشن بھیج کر قیمتوں پر عملدرآمد کروانے کی ہدایت کی گئی ہے۔ وزارت خوراک کے جاری کردہ نوٹیفیکیشن کے مطابق زائد قیمت پر چینی بیچنے والوں کے خلاف کارروائی ہوگی، عملدرآمد نہ کرنے پر شوگر ملز، ڈیلرز، ڈسٹریبیوٹرز، ریٹیلرز کے خلاف کارروائی ہوگی۔ اس سے قبل حکومت نے 30 جولائی کو چینی کی ریٹیل اور ایکس ملز قیمت مقرر کی تھی، سیلز ٹیکس سمیت چینی کا ایکس ملز ریٹ 84.50 روپے فی کلو مقرر کیا گیا تھا، جبکہ چینی کی سرکاری ریٹیل قیمت 89.50 روپے فی کلو مقرر کی گئی تھی۔

جبکہ کچھ روز قبل وزیر خزانہ شوکت ترین نے اعلان کیا تھا کہ جلد ہی چینی، گھی، تیل اور آٹے کی قیمتوں میں کمی لے آئیں گے۔ حکومت نے چینی، گھی، آئل، اور آٹے پر سبسڈی دینے کا اعلان کیا ہے۔