Live Updates

وزیراعظم سردارعبدالقیوم نیازی کی وفاقی وزیر اسد عمر سے ملاقات

آزاد کشمیر کیلئے ترقیاتی پیکیج ،وزیراعظم پاکستان کی جانب سے آزاد کشمیر کے مسائل کے حل کیلئے چیف سیکرٹری آزادکشمیر کی سربراہی میں بنائی گئی کابینہ کمیٹی پر تبادلہ خیال

بدھ 29 ستمبر 2021 17:44

وزیراعظم سردارعبدالقیوم نیازی کی وفاقی وزیر اسد عمر سے ملاقات

اسلام آباد (اُردو پوائنٹ اخبارتازہ ترین - این این آئی۔ 29 ستمبر2021ء) وزیراعظم پاکستان عمران خان کے ترقی یافتہ کشمیر ویژن کی روشنی میں وزیر اعظم آزاد جموں وکشمیر سردار عبدالقیوم نیازی اور وفاقی وزیر برائے منصوبہ بندی ترقی و خصوصی اقدامات اسد عمر کے درمیان اسلام آباد میں ملاقات ہوئی۔ ملاقات میں آزاد کشمیر کے لئے ترقیاتی پیکج اور وزیراعظم پاکستان کی جانب سے آزادجموں و کشمیر کے مسائل کے حل کے لئے چیف سیکرٹری آزادکشمیر کی سربراہی میں بنائی گئی کابینہ کمیٹی پر تبادلہ خیال کیا گیا۔

اس موقع پر وزیراعظم سردار عبدالقیوم نیازی نے ریاست کی تعمیر وترقی اور وسائل میں اضافے کی سمت متعین کرنے کے لئے اعلیٰ سطح کے اجلاسوں پر وزیراعظم پاکستان اور ان کی کابینہ کا شکریہ ادا کیا۔

(جاری ہے)

انہوں نے کہا کہ وزیراعظم عمران خان کی ولولہ انگیز قیادت میں آزادکشمیر کو ترقی اور خوشحالی کا گہوارہ بنائیں گے۔ترقی یافتہ کشمیر عمران خان کا ویژن ہے جسے تحریک انصاف کی حکومت عملی طور ہر لاگو کرے گی۔

تاریخ ساز ترقیاتی پیکج سے ریاست کے عوام کو بنیادی سہولتیں ان کی دہلیز پر میسر ہونگی۔وفاقی وزیر اسد عمر نے کہا کہ جس طرح سے پاکستان کے دوسرے علاقوں کے لیے ترقیاتی پیکج بنائے گئے ہیں اسی طرز پر آزاد کشمیر کے لیے بھی جلد ترقیاتی پیکج بنانے کا آغازکیا جائے گا جس میں پلاننگ ڈویژن اور اے جے کی حکومت مل کر سیاحت ،ہائیڈل ،تعلیم ،صحت جیسے شعبوں کے بنیادی ڈھانچے کو حتمی شکل دیں گی۔وزیراعظم عمران خان کی ہدایت ہے کہ آزاد کشمیر کو ترقیاتی فنڈز میں زیادہ سے زیادہ حصہ دیا جائے۔ آزاد کشمیر میں سیاحت، ہائیڈل ، جنگلات ، لائیو اسٹاک اور زراعت کے شعبوں میں بڑے منصوبے شروع کریں گے ، منصوبوں پر عمل درامد اور انکی بروقت تکمیل کو بھی یقینی بنایا جائے گا۔