فاسٹ بائولر عاکف جاوید کا کورونا ٹیسٹ دوسری بار مثبت آگیا

پی سی بی نے سری لنکا روانگی سے قبل ٹیسٹ مثبت آنے پر پیسر کا نام سکواڈ سے واپس لے لیا

ذیشان مہتاب جمعرات 21 اکتوبر 2021 12:41

فاسٹ بائولر عاکف جاوید کا کورونا ٹیسٹ دوسری بار مثبت آگیا

لاہور (اردو پوائنٹ تازہ ترین اخبار ۔ 21 اکتوبر 2021ء ) پاکستان شاہینز کے فاسٹ بولر عاکف جاوید کا کورونا ٹیسٹ دوسری بار مثبت آگیا۔ ترجمان کے مطابق پاکستان کرکٹ بورڈ (پی سی بی) نے روانگی سے قبل ٹیسٹ مثبت آنے پر عاکف جاوید کا نام سری لنکا جانے والی ٹیم سے واپس لے لیا۔ واضح رہے کہ عاکف جاوید کو دورہ سری لنکا میں 3 ون ڈے میچوں میں شرکت کرنی تھی۔

ترجمان پی سی بی کا کہنا ہے کہ عاکف جاوید کا پہلا ٹیسٹ بلوچستان کی جانب سے کھیلتے ہوئے مثبت آیا تھا لیکن 10 دن کی آئسولیشن کے بعد عاکف جاوید کا کورونا ٹیسٹ منفی آگیا تھا۔

(جاری ہے)

ترجمان کے مطابق دو ٹیسٹ منفی آنے کے بعد روانگی سے قبل ان کا دوسری بار ٹیسٹ مثبت آگیا ہے۔ وقت کی کمی کی وجہ سے عاکف کی جگہ کسی متبادل کھلاڑی کا نام نہیں دیا گیا ہے اور ٹیم مینجمنٹ کے پاس دستیاب بولرز میں سے عاکف کا متبادل منتخب کرنے کا آپشن ہوگا۔

پاکستان شاہینز نے کراچی میں حنیف محمد ہائی پرفارمنس سنٹر میں ہیڈ کوچ اعجاز احمد کی نگرانی میں 17 سے 20 اکتوبر تک 4 روزہ تربیتی کیمپ میں شرکت کی۔ ٹیم کی قیادت سعود شکیل کریں گے جب کہ کامران غلام نائب کپتان ہیں۔