عبداللہ شفیق نے وہ اعزاز حاصل کرلیا جو سعید انور بھی نہ کرپائے

فخر زمان کے بعد ٹیسٹ ڈیبیو پر دونوں اننگز میں نصف سنچریاں سکور کرنیوالے دوسرے پاکستانی اوپنر بن گئے

Zeeshan Mehtab ذیشان مہتاب پیر 29 نومبر 2021 16:44

عبداللہ شفیق نے وہ اعزاز حاصل کرلیا جو سعید انور بھی نہ کرپائے
چٹاگانگ (اردو پوائنٹ تازہ ترین اخبار ۔ 29 نومبر 2021ء ) قومی ٹیم کے اوپنر عبداللہ شفیق ٹیسٹ ڈیبیو پر دونوں اننگز میں نصف سنچریاں سکور کرنے والے دوسرے پاکستانی اوپننگ بلے باز بن گئے ہیں ۔ عبداللہ شفیق نے ٹیسٹ کے چوتھے روز میچ میں اپنی دوسری نصف سنچری مکمل کی، انہوں نے 88 گیندوں پر نصف سنچری بنائی جس میں 6 چوکے اور ایک چھکا شامل ہے۔ عبداللہ شفیق سے قبل فخر زمان نے 2018ء میں ابوظہبی ٹیسٹ میں آسٹریلیا کیخلاف اپنی دونوں اننگز میں نصف سنچریاں سکور کی تھیں ۔

ان کے علاوہ عمر اکمل، اظہر محمود اور یاسر حمید بھی اپنے ٹیسٹ ڈیبیو پر دونوں اننگز میں نصف سنچریاں سکور کرچکے ہیں ۔ یاد رہے کہ چٹاگانگ ٹیسٹ کے چوتھے روز کھیل کے اختتام پر پاکستان نے 202 رنز کے ہدف کے تعاقب میں کوئی وکٹ کھوئے بغیر 109 رنز سکور کرلیے ہیں ۔

(جاری ہے)

چٹاگانگ کے ظہور احمد چوہدری کرکٹ سٹیڈیم میں کھیلے جا رہے میچ میں شاہینوں نے دوسری اننگز میں بھی بنگلادیش کی ابتدائی وکٹیں جلد گرا دیں، کھیل کے چوتھے روز بنگلا دیش نے اپنی دوسری اننگز کا آغاز 39 رنز 4 کھلاڑی آؤٹ سے کیا لیکن حسن علی نے بنگلا دیش کے تجربہ کار بلے باز مشفیق الرحیم کو 16 رنز پر پویلین کلین بولڈ کر دیا۔

نعمان علی نے یاسر علی کے سر پر گیند ماری جس سے یاسر ریٹائرڈ ہرٹ ہوگئے ، مہدی حسن ساجد خان کی گیند پر ایل بی ڈبلیو ہوگئے ۔ پہلی اننگز کے سنچری میکر لٹن داس نے دوسری اننگز میں بھی اچھی بیٹنگ کا مظاہرہ کرتے ہوئے 59 رنز سکور کیے۔ پاکستان کی جانب سے شاہین شاہ آفریدی نے شاندار بولنگ کا مظاہرہ کرتے ہوئے 5 کھلاڑیوں کو آؤٹ کیا جب کہ 3 وکٹیں ساجد خان اور 2 وکٹیں حسن علی کے حصے میں آئیں۔

ہدف کے تعاقب میں پاکستانی اوپنرز کے درمیان 100 رنز کی شراکت داری قائم ہوگئی اور دونوں نے نصف سنچری مکمل کرلی ہے۔ پاکستان کو جیت کے لیے کھیل کے آخری روز مزید 93 رنز درکار ہیں جبکہ اس کی تمام 10 وکٹیں باقی ہیں۔ عابد علی نے 92 گیندوں پر 6 چوکوں کی مدد سے نصف سنچری بنائی ۔ یہ ان کے کیریئر کی تیسری نصف سنچری ہے۔ عبداللہ شفیق نے بھی نصف سنچری مکمل کرلی ہے، انہوں نے 88 گیندوں پر نصف سنچری بنائی جس میں 6 چوکے اور ایک چھکا شامل ہے۔
>