جنوبی افریقہ کو وائٹ بال سیریز میں بھی سپن کے جال میں پھنسانے کا منصوبہ

وائٹ بال سیریز میں یکطرفہ طور پر بڑے رنز کے لیے پچز تیار نہیں کی جائیں گی: ذرائع

ذیشان مہتاب جمعہ 17 اکتوبر 2025 10:52

جنوبی افریقہ کو وائٹ بال سیریز میں بھی سپن کے جال میں پھنسانے کا منصوبہ

لاہور (اردو پوائنٹ تازہ ترین اخبار ۔ 17 اکتوبر 2025ء ) پاکستان کرکٹ بورڈ (پی سی بی) نے جنوبی افریقہ کے خلاف وائٹ بال سیریز میں ان کی بیٹنگ سٹرنتھ کی وجہ سے پچز کو فلیٹ بیٹنگ ٹریکس نہ بنانے کا فیصلہ کیا ہے۔

ذرائع کا کہنا ہے کہ جنوبی افریقہ کے خلاف وائٹ بال کرکٹ سیریز کے لیے بھی پلان تیار کرلیا گیا ہے جس کے مطابق وائٹ بال سیریز میں فلیٹ بیٹنگ ٹریکس نہ بنانے کا فیصلہ کیا گیا ہے۔

ذرائع کے مطابق فلیٹ بیٹنگ ٹریکس پر جنوبی افریقہ کے بیٹرز کی اسٹرنتھ کی وجہ سے فیصلہ کیا گیا ہے اور تھنک ٹینک نے کیوریٹرز کو پچز کے حوالے سے ہدایات جاری کر دیں ہیں جس سے وائٹ بال سیریز میں ٹریکس سے باؤلرز خاص طور پر اسپنرز کو بھی مدد ملے گی۔

ذرائع کا بتانا ہے کہ وائٹ بال سیریز میں یک طرفہ طور پر بڑے رنز کے لیے پچز تیار نہیں کی جائیں گی ، پاکستان سکواڈ میں اضافی سپنر کو شامل کیے جانے کا قوی امکان ہے۔

(جاری ہے)

ذرائع نے بتایا کہ جنوبی افریقہ کے خلاف وائٹ بال سیریز کے لیے سکواڈ پر مشاورت جاری ہے۔

ذرائع سلیکشن کمیٹی کے مطابق ٹی ٹونٹی سکواڈ کے لیے تمام کھلاڑی دستیاب ہیں اور کسی کے نام کے آگے کراس کا نشان نہیں لگا ہے، بابر اعظم اور نسیم شاہ سمیت تمام وائٹ بال کھیلنے والے کھلاڑی زیر غور ہیں۔

ذرائع سلیکشن کمیٹی کا کہنا ہے کہ کوئی بھی کھلاڑی اگر اس وقت ٹیم کی ضرورت ہے تو نظر انداز نہیں کیا جائے گا کیونکہ ٹی ٹونٹی ورلڈ کپ کے لیے تیاری آخری مرحلے میں داخل ہو رہی ہیں۔

ذرائع سلیکشن کمیٹی نے بتایا کہ بہترین دستیاب کھلاڑیوں کے ساتھ آنے والے میچز کے لیے اسکواڈ ترتیب دیا جا رہا ہے۔

علم میں رہے کہ پاکستان جنوبی افریقہ کے درمیان ٹی ٹونٹی میچز 28 ، 31 اکتوبر اور یکم نومبر کو کھیلے جائیں گے جبکہ ون ڈے میچز 4 ، 6 اور 8 نومبر کو کھیلے جائیں گے۔