ژ*کام نہ ہونے پر ناراضی کا اظہار کروتو الزامات لگادیئے جاتے ہیں، غفار وٹو

'منحرف ہونے پر کروڑوں روپے لینے کا الزام لگایا گیا، میں پیسے لینے اور دینے والے دونوں پر لعنت بھیجتا ہوں، ناراض رکن اسمبلی پی ٹی آئی کا ویڈیوبیان

اتوار 20 مارچ 2022 19:15

اسلام آباد(اُردو پوائنٹ اخبارتازہ ترین - آن لائن۔ 20 مارچ2022ء) پاکستان تحریک انصاف کے ناراض رکن اسمبلی غفار وٹو نے حکومت سے شدید ناراضگی کا اظہار کرتے ہوئے کہا ہے کہ تین سالوں میں اپنے حلقے میں ایک کام بھی نہ کرواسکا، جب کام نہ ہونے پر کوئی ناراضگی کا اظہار کرتا ہے تو ہم پر الزام لگا دیے جاتے ہیں۔

(جاری ہے)

این اے 166 بہاولنگر سے پی ٹی آئی کے رکن قومی اسمبلی غفار وٹو نے اپنے ویڈیو بیان میں کہا کہ میں 2018 میں حلقہ این اے 166 بہاولنگر سے آزاد حیثیت سے جیتا، اور الیکشن جیتنے کے بعد پی ٹی آئی میں شمولیت اختیار کی، کیوں کہ اس وقت پی ٹی آئی کا نعرہ تھا کرپشن مکاؤ۔

غفار وٹو کا کہنا تھا کہ میں حکومت کے ساڑھے تین سالوں میں اپنے حلقے میں ایک کام بھی نہ کرواسکا، میرا مطالبہ تھا کہ میرے حلقے کو سی پیک اور موٹروے کے ساتھ لنک کیا جائے لیکن وہ بھی نہ ہوسکا، اور جب ہمارا کام نہ ہونے پر کوئی ناراضگی کا اظہار کرتے ہیں تو ہم ہر الزام لگا دیے جاتے ہیں۔رکن قومی اسمبلی غفار وٹو کا مزید کہنا تھا کہ حکومتی وزار کی جانب سے مجھ پر الزام لگایا گیا کہ میں نے کروڑوں روپے لیے اور منحرف ہوگیا، میں پیسے لینے اور دینے والے دونوں پر لعنت بھیجتا ہوں، رشوت لینے اور دینے والا دونوں ہی جہنمی ہیں۔